અમદાવાદ કલેક્ટરે ઈટાલિયન દંપતીને મહેન્દ્રને દત્તક સોંપવાની પ્રક્રિયા પૂર્ણ કરી

અમદાવાદ, તા.૧૦
કોરોના મહામારીને કારણે દેશ અને દુનિયાની સાથે રાજ્યમાં પણ અનેક સેવાઓ બંધ હતી જેમાં દત્તક લેવાની કાનૂની પ્રક્રિયાઓ પણ મુલતવી હતી ત્યારે સેન્ટ્રલ એડોપ્શન રિસોર્સ ઓથોરિટી ‘કારા’એ આ વર્ષે નવેમ્બર મહિનાને ઈન્ટરનેશનલ એડોપ્શન મંથ જાહેર કર્યો છે. ત્યારે અમદાવાદ કલેક્ટરે ઈટાલિયન દંપતીને બાળક દત્તક આપવાની પ્રક્રિયા પૂર્ણ કરતા સામાજિક સંસ્થામાં રહેતો અને એક સમયે કલબ-ફૂટથી પીડાતો મહેન્દ્ર હવે ઈટાલીની શેરીઓમાં દોડાદોડ કરશે. મહેન્દ્રની ઉંમર ૫ વર્ષ અને ૧૧ મહિના છે. ૨.૫ વર્ષની ઉંમરમાં સામાજિક સંસ્થામાં પ્રવેશ મેળવ્યો ત્યારે મહેન્દ્ર પગની વિકલાંગતા (ક્લબ ફૂટ- ત્રાંસા પગ) અને અપૂર્ણ શારીરિક વિકાસ જેવા પડકારો ઝીલી રહ્યો હતો. સ્પીચ થેરાપી, ફિઝીયોથેરાપી અને જરૂરી તબીબી સારવારને કારણે મહેન્દ્રનો શારીરિક વિકાસ પૂર્વવત બન્યો હતો. આજે નાનકડો મહેન્દ્ર દોડી શકે છે, ડાન્સ કરી શકે છે. તા. ૧૪/૧૧/૨૦૧૪ના રોજ જન્મેલા મહેન્દ્રને તેના કાનૂની પિતા આલ્બર્ટો અને માતા- સુ.ડોસ્સી સિનલ્ડાવાયા મુંબઈથી ઇટલી લઈ જશે. અમદાવાદ જિલ્લા સેવાસદન ખાતે કલેક્ટર સંદીપ સાગલેએ ઇટાલિયન દંપતીને બાળક દત્તક આપવાની કાનૂની પ્રક્રિયા આજે પૂર્ણ કરી હતી. મહેન્દ્રના કાનૂની પિતા ઇટલીમાં મેટલ વર્કર અને માતા પેસ્ટ્રી શેફ છે. મહેન્દ્રની માતાએ કહ્યું કે, ઇટલીમાં અમે સંયુક્ત પરિવારમાં રહીએ છીએ. મહેન્દ્રને હું જીવનના આવશ્યક મૂલ્યો શીખવીશ. તેને કંઈ બનવાનું દબાણ નહીં કરૂં પરંતુ ખુલ્લાપણું આપી તેનો ઉછેર કરીશ. મહેન્દ્રના પિતાએ કહ્યું કે, ગત માર્ચમાં જ મહેન્દ્રને દત્તક લેવાની પ્રક્રિયા શરૂ કરી હતી. પરંતુ કોરોના મહામારીને કારણે બધું અટવાઈ પડ્યું હતું. અંતે અમદાવાદ જિલ્લા વહીવટી તંત્ર, ભારતની કેન્દ્ર સરકાર અને ‘કારા’ના સહયોગથી બધું સમુસુતરૂં પાર પડ્યું છે. આમ અમદાવાદની સામાજિક સંસ્થામાં રહેતો મહેન્દ્ર હવે ઈટાલીની શેરીઓમાં દોડદોડ કરશે.