(એજન્સી) તા.૨૭
લાભપ્રદ હોદ્દાના કેસમાં પોતાને ગેરલાયક ઠરાવવાના મામલામાં આપના ૨૦ ધારાસભ્યોની અરજી પર સુનાવણીમાં એક નવા વળાંકમાં ભારતના ચૂંટણી પંચે કેટલાક ખાનગી અને ગોપનીય દસ્તાવેજો દિલ્હી હાઇકોર્ટ સમક્ષ રજૂ કર્યા હતા અને જણાવ્યું હતું કે આ દસ્તાવેજો ધારાસભ્ય સાથે શેર કરી શકાય નહીં.
ન્યાયમૂર્તિ સંજીવ ખન્ના અને ચંદ્રશેખરની બેંચને ચૂંટણી પંચના વકીલ દ્વારા જણાવવામાં આવ્યંુ હતું કે તેઓ ચૂંટણી પંચમાં યોજાયેલ કાર્યવાહી સંબંધીત અંગત નોંધ સહિત કેટલાક દસ્તાવેજો સુપરત કરી રહ્યું છે. અમારો આ ખાનગી દસ્તાવેજો પર વિશેષાધિકાર છે અને તેથી અમે અરજદાર આપના ૨૦ ધારાસભ્યોને તે પૂરા પાડી શકીએ નહીં એવું ચૂંટણી પંચના વકીલ અમિત શર્માએ બેંચ સમક્ષ સીલબંધ કવરમાં દસ્તાવેજો રજૂ કરતા જણાવ્યું હતું.
બેંચે ચૂંટણી પંચના વકીલને વિશેષાધિકારનો એક ભાગ છૂપાવ્યા બાદ દસ્તાવેજો ધારાસભ્યોને આપી શકાય કે કેમ તે અંગે સૂચના મેળવવા ચૂંટણી પંચના વકીલને જણાવ્યું હતું. ગેરલાયક ઠરેલા ધારાસભ્યોની અપીલ પર સુનાવણી દરમિયાન ચૂંટણી પંચ દ્વારા આ અંગેના દસ્તાવેજો રજૂ કરવામાં આવ્યા હતા. આથી ધારાસભ્યોએ ચૂંટણી પંચની ભલામણને રાષ્ટ્રપતિ રામનાથ કોવિંદે પોતાની ભલામણ જારી કર્યા બાદ ધારાસભ્યોએ તેમની ગેરલાયકાતને પડકારવા હાઇકોર્ટના દ્વારો ખટખટાવ્યા હતા.
હાઇકોર્ટે તેમને ગેરલાયક ઠરાવતા કેન્દ્રના નોટિફીકેશન સામે મનાઇહુકમ આપવા ૨૪ જાન્યુ.ના રોજ ઇન્કાર કર્યો હતો પરંતુ ચૂંટણી પંચને ખાલી જગ્યાઓ ભરવા માટે પેટા ચૂંટણીની તારીખો જાહેર કરવા જેવા પગલાઓ નહીં ભરવા જણાવ્યું હતું. ભારતના ચૂંટણી પંચે ૧૯ જાન્યુ.ના રોજ આપના ૨૦ ધારાસભ્યોને ગેરલાયક ઠરાવવાની ભલામણ કરી હતી અને રાષ્ટ્રપતિએ ચૂંટણી પંચની આ અપીલનો બીજા દિવસે સ્વીકાર કર્યો હતો.