ઓખા દરિયામાંથી કોસ્ટગાર્ડ શંકાસ્પદ જહાજ ઝડપ્યું

જામનગર, તા.૧ર
ઓખાના સમુદ્રમાંથી એક શંકાસ્પદ જહાજને કોસ્ટગાર્ડ દ્વારા આંતરવામાં આવ્યું છે અને તપાસનો ધમધમાટ શરૃ કરવામાં આવ્યો છે.
ઓખા કોસ્ટગાર્ડની શીપ સમુદ્રમાં પેટ્રોલીંગ કરી રહી હતી. આ દરમિયાન એક શંકાસ્પદ જહાજ સમુદ્રમાં જોવા મળતા કોસ્ટગાર્ડ દ્વારા તેને આંતરવામાં આવ્યું હતું અને તેના કેપ્ટન સહિતના કર્મચારીઓની પ્રાથમિક પૂછપરછ કરવામાં આવી હતી.આ દરમિયાન સંતોષકારક વિગતો નહીં મળતા આ શંકાસ્પદ જહાજને ગઈકાલે ઓખાની જેટી ઉપર લાવી લંગારી દેવામાં આવ્યું હતું.
હાલ કેન્દ્ર સરકાર હસ્તકની વિવિધ સુરક્ષા એજન્સીઓના અધિકારીઓ દ્વારા તપાસનો ધમધમાટ શરૃ કરવામાં આવ્યો છે. જો કે, આ બાબતે સતાવાર રીતે કોઈ જાહેરાત કરવામાં આવી નથી.