સિડની,તા.૬
ઓસ્ટ્રેલિયાએ ન્યૂઝીલેન્ડને ત્રણ ટેસ્ટની સીરિઝની અંતિમ મેચમાં ૨૭૯ રને હરાવ્યું હતું. સિડની ક્રિકેટ ગ્રાઉન્ડ ખાતે ચોથા દિવસે કિવિઝ ૧૩૬ રનમાં ઓલઆઉટ થયું હતું. કાંગારુંએ સાતમી વાર સીરિઝની બધી મેચમાં કિવિઝને માત આપી છે. ન્યૂઝીલેન્ડ સામે ઓસ્ટ્રેલિયા કુલ ૧૫મી સીરિઝ જીત્યું છે. છેલ્લે તેઓ ૨૦૧૬માં સીરિઝ જીતવામાં સફળ રહ્યા હતા. મેચમાં ઓસ્ટ્રેલિયાએ પ્રથમ દાવમાં ૪૫૪ રન કર્યા હતા. જવાબમાં ન્યૂઝીલેન્ડ ૨૫૬ રનમાં ઓલઆઉટ થયું હતું. બીજી ઇનિંગ્સમાં ઓસ્ટ્રેલિયાએ ૨ વિકેટે ૨૧૭ રન કરીને ઇનિંગ્સ ડિક્લેર કરી હતી.
ઓસ્ટ્રેલિયા માટે ડેવિડ વોર્નરે બીજી ઇનિંગ્સમાં અણનમ ૧૧૧ રન કર્યા હતા. આ તેના કરિયરની ૨૪મી સદી છે. પહેલી ઇનિંગ્સમાં ડબલ સેન્ચુરી મારનાર લબુશેને બીજી ઇનિંગ્સમાં ૫૯ રન કર્યા હતા. તેણે સીરિઝમાં ૯૧.૫ની એવરેજથી ૫૪૯ રન કર્યા હતા. તેને મેન ઓફ ધ મેચ અને મેન ઓફ ધ સીરિઝ તરીકે પસંદ કરવામાં આવ્યો હતો.
નેથન લાયને બીજી ઇનિંગ્સમાં પાંચ વિકેટ લીધી હતી. તેણે પહેલી ઇનિંગ્સમાં પણ પાંચ વિકેટ લીધી હતી. લાયને ત્રીજીવાર કરિયરમાં ૧૦ વિકેટ લીધી છે. તેમજ ૧૮મી વાર કરિયરમાં પાંચ વિકેટ પોતાના નામે કરી છે. લાયને ટેસ્ટમાં કુલ ૩૯૦ વિકેટ લીધી છે. તે સૌથી વિકેટ લેવાના મામલે દક્ષિણ આફ્રિકાના પૂર્વ ફાસ્ટ બોલર મખાયા એન્ટિનીની બરોબરીમાં આવી ગયો છે. તેણે ઇંગ્લેન્ડના ઇયાન બોથમ (૩૮૩ વિકેટ)ને પાછળ છોડી દીધો છે.
આઈસીસી વિશ્વ ટેસ્ટ ચેમ્પિયનશિપ પોઈન્ટ ટેબલમાં ભારત અને ઓસ્ટ્રોલિયા પછી ત્રીજા નંબર પર પાકિસ્તાન ૮૦ આંકડાઓ સાથે સ્થાન ધરાવે છે. શ્રીલંકાનાં ૮૦ આંકડા છે અને તે ચોથા સ્થાન પર છે. જ્યારે ૬૦ આંકડા સાથે ન્યૂઝીલેન્ડ ૫માં નંબરે, ૫૬ આંકડા સાથે ઈંગ્લેન્ડ છઠ્ઠા સ્થઆને ૩૦ આંકડા સાથે દક્ષિણ આફ્રિકા ૭માં નંબરે છે. જ્યારે વિશ્વ ટેસ્ટ ચેમ્પિયનશીપમાં વેસ્ટઈન્ડિઝ અને બાંગ્લાદેશ હજુ સુધી ખાતુ ખોલાવી નથી શક્યા.
ઉલ્લેખનીય છે કે વર્લ્ડ ટેસ્ટ ચેમ્પિયનશીપની પોંઈટ સિસ્ટમ અનુસાર બે મેચોની સીરીઝમાં જીત પર ૬૦ પોઈન્ટ્‌સ, ટાઈ થવા પર ૩૦ પોઈન્ટ્‌સ અને ડ્રો થવા પર ૨૦ પોઈન્ટ્‌સ મળશે.
જ્યારે જે કોઈ ટીમ મેચ હારી જાયતો એક પણ પોઈન્ટ મળશે. આ નિર્ણયમાં કોઈ પણ મેચોની સીરીઝ હોય તે હારવાવાળી ટીમને કોઈ પોઈન્ટ મળશે નહી. ત્યારે ત્રણ મેચોની સીરીઝમાં જીત મેળવવા બદલ ૪૦ પોઈન્ટ, ટાઈ થવા પર ૨૦ પોઈન્ટસ અને ડ્રો થવા પર ૧૩ પોઈન્ટસ મળશે.