(સંવાદદાતા દ્વારા) ભૂજ, તા.૧પ
યુવા હૈયાઓ જ્યારે વેલેન્ટાઈન ડેના પોતાના પ્રેમની અભિવ્યક્તિ કરી રહ્યા હતા ત્યારે તે જ દિવસે કચ્છમાં એક પ્રેમી યુગલે સજોડે આપઘાત કરી લેતા અરેરાટી વ્યાપી હતી.માંડવી તાલુકાના બિદડા ગામના ૧૯ વર્ષના ફેનીલ મંગલ સંધાર નામના યુવાન અને બાજુના નાની ખાખર ગામની એક ૧૭ વર્ષની કિશોરીએ તા.૧૪/રના સવારે યુવાનના ઘરે જ સજોડે ગળેફાંસો ખાઈ આપઘાત કરી લીધો હતો. યુવાન ફેનીલ ખાનગી કંપનીમાં નોકરી કરતો હતો અને ૧૭ વર્ષીય કિશોરી અભ્યાસ કરતી હતી. તા.૧૪/રના રોજ યુવાનના પરિવારના સભ્યો લગ્નપ્રસંગે બહાર ગયા હતા ત્યારે યુવક અને યુવતી યુવાનના ઘરે મળ્યા હતા અને એકબીજાને ગુલાબનું ફૂલ આપી સજોડે ગળેફાંસો ખાઈ લીધો હતો. માંડવી પોલીસે બનાવના સ્થળેથી ગુલાબના ફૂલ ઝેરી દવાની બોટલ પણ કબજે કરી છે. આ પ્રેમી યુગલે એકસાથે મરવાનો દૃઢ નિર્ધાર કર્યો હોય તેમ ઝેરી દવાની બોટલ પણ સાથે રાખી હતી. જો કે બંને ગળે ફાંસો ખાઈ જીવન ટૂંકાવ્યું હતું.