કેન્દ્રીય ઉચ્ચ ટીમે મુખ્યમંત્રી વગેરે સાથે વિસ્તૃત બેઠક યોજી કર્યો પરામર્શ
રાજ્યમાં હોમ આઈસોલેશન, સર્વેલન્સ, મોનિટરીંગ વગેરેને લઈ કેન્દ્રીય ટીમે સંતોષ વ્યક્ત કર્યો

(સંવાદદાતા દ્વારા) ગાંધીનગર,તા.રર
રાજયમાં કોરોનાના ઉછાળારૂપ કેસો બહાર આવવાને પગલે કેન્દ્ર સરકાર દ્વારા મોકલવામાં આવેલ કેન્દ્રીય ટીમે આજે અમદાવાદ, વડોદરા, મહેસાણાની મુલાકાત લઈને કોરોનાની સ્થિતિની સમીક્ષા કરવા સાથે વિગતો મેળવી જરૂરી નિર્દેશો આપ્યા હતા. તે બાદ મુખ્યમંત્રી રૂપાણી વગેરે સાથે બેઠક કરી પરામર્શ કર્યો હતો. કેન્દ્રીય ટીમે રાજયમાં કોરોના સંક્રમણ નિયંત્રણ, સારવાર, માર્ગદર્શન અને ટ્રીટમેન્ટ પ્રોટોકોલ સર્વેલન્સ વગેરે મુદ્દાઓ પર વિસ્તૃત છણાવટ કરી હતી. નવી દિલ્હીની નેશનલ સેન્ટર ફોર ડિસીઝ કંટ્રોલના ડાયરેક્ટર ડૉ. સિંઘના નેતૃત્વ હેઠળની આ ટીમમાં એડિશનલ ડાયરેક્ટર ડૉ. જૈન અને રામ મનોહર લોહિયા હોસ્પિટલના પલ્મોનોલોજિસ્ટ ડૉ. કૌશિકનો સમાવેશ થાય છે.
કેન્દ્રીય ટીમે ગુજરાતમાં ધન્વંતરી આરોગ્યરથનો જે પ્રયોગ અત્યંત સફળ રહ્યો છે, તેનાથી સંતોષ દર્શાવી, અન્ય રાજ્યોમાં પણ આ ધન્વંતરી રથ મોડલ અપનાવી શકાય તેમ મુખ્યમંત્રી સાથેની ચર્ચામાં જણાવ્યું હતું. તેમણે ખાસ કરીને ગુજરાતમાં હોમ આઇસોલેશન, એરિયા સ્પેસિફિક સર્વેલન્સ અને પદ્ધતિસરના મોનિટરિંગની પણ પ્રશંસા કરી હતી. હાઉસ ટુ હાઉસ સર્વેને ધન્વંતરી રથ સાથે લિંક કરીને, સમન્વય કરીને જે ઝડપી ટ્રેસિંગ અને સારવાર ફોલો અપ થાય છે, તેનાથી કોમ્યુનિટી ટ્રાન્સમિશન-સંક્રમણ વ્યાપકપણ નિયંત્રણમાં રહ્યું છે, તેનાથી આ ટીમે સંપૂર્ણ સંતોષ દર્શાવ્યો હતો.
મુખ્યમંત્રીએ પણ ગુજરાતમાં કોવિડ માટે તેમણે ખાનગી હોસ્પિટલોના સહયોગ અને નિયમિતપણે બેઠકો યોજીને રાજ્યમાં કોરોના સંક્રમણના નિયંત્રણ માટે હાથ ધરાયેલી તમામ બાબતોની વિગતવાર ચર્ચા ટીમ સાથે કરી હતી. કેન્દ્રીય ટીમના વડા ડૉ. સિંઘે આશાવર્કર બહેનો, ફિમેલ હેલ્થ વર્કર્સ તેમજ લોકો-નાગરિકો સાથે સંવાદ-વાતચીત કરીને તેમણે જે પ્રતિભાવો મેળવ્યા તે પૂર્ણતઃ સંતોષજનક છે તેમ સ્પષ્ટપણે જણાવ્યું હતું. ડૉ. સિંઘે રાજ્યની હોસ્પિટલોમાં આવતા કોવિડ પેશન્ટ્‌સની સ્થિતિનું સ્કેનિંગ કરીને પેશન્ટની તબક્કાવારની સ્થિતિનું મોનિટરિંગ થાય તે દિશાના પ્રયાસોને આવકાર્ય ગણાવ્યા હતા. જે રોગીઓ સંક્રમણમુક્ત થયા છે તેમને પોસ્ટ કોવિડ સ્થિતિમાં યોગ-પ્રાણાયમ અને આયુષ પદ્ધતિથી લાભ-ફાયદો થયાના ગુજરાતમાં જે નોંધપાત્ર ઉદાહરણો છે તેનો પણ અન્ય રાજ્યોમાં પ્રસાર કરી શકાય અને આ પ્રાચીન પદ્ધતિની આવશ્યકતા વ્યાપક બનાવાય તેમ તેમણે જણાવ્યું હતું.
ગુજરાતમાં ટેકનોલોજીનો ઉપયોગ કરીને આરોગ્ય સેતુ એપ, ઈતિહાસ એપ દ્વારા કોન્ટેક્ટ ટ્રેસિંગ, હોટસ્પોટ આઈડેન્ટિફીકેશન વગેરેમાં જે ગતિશીલ કામગીરી થાય છે તેની તેમણે સરાહના કરી હતી. આ ટીમે સીએમ ડેશબોર્ડની પણ મુલાકાત લઈને હોસ્પિટલોમાં રિયલ ટાઈમ મોનિટરીંગ, ટ્રીટમેન્ટ અને પેશન્ટ કેરની થઈ રહેલી ઓનલાઈન કામગીરીને નિહાળી પ્રભાવિત થયા હતા. ડેશબોર્ડના માધ્યમથી આ ટીમના સભ્યોએ અમદાવાદ, વડોદરા, રાજકોટ અને સુરતની હોસ્પિટલના તબીબો, આરોગ્ય કર્મચારીઓ અને સારવાર લઈ રહેલા વ્યક્તિઓ સાથે સંવાદ કરીને માહિતી પણ મેળવી હતી. ડૉ. એસ.કે. સિંઘે ગુજરાતમાં હબ એન્ડ સ્પોક મોડલ પર હોસ્પિટલોને દર્દીઓની સારવાર માટે એકબીજા સાથે જોડીને તેમજ ટર્શરી કેર સેન્ટરને પણ જોડીને જે પ્રયોગ થયો છે તેની પ્રશંસા કરી હતી.