(એજન્સી) તા.૧
હજુ પણ કટ્ટર હિન્દુવાદીઓ તરફથી આચરવામાં આવી રહેલી હિંસા અટકવાનું નામ લઈ રહી નથી. ગૌરક્ષાના નામે ફરી એકવાર ઝારખંડમાં પાંચ આદિવાસી ખ્રિસ્તી યુવકોને સિમડેગા જિલ્લાના ભેડીકુદર ગામ ખાતે માર મારવામાં આવ્યો હતો અને તેમના વાળ કાપી તેમનું મુંડન કરી દેવાયું હતું. તેમને બળજબરીપૂર્વક જય શ્રીરામનો સૂત્રોચ્ચાર કરવા મજબૂર કરાયા હતા. આ ઘટના ૧૬ સપ્ટેમ્બરના રોજ બની હતી. એક જાણીતા મીડિયા ટુ સર્કલ.નેટ સાથેની વાતચીતમાં પીડિતોએ જણાવ્યું કે, હુમલાખોરોએ ખ્રિસ્તી આદિવાસી યુવકો પર ગૌહત્યા કરવાનો આક્ષેપ કર્યો હતો. જો કે, આ દરમિયાન અમે સાત લોકો હતા અને તેમણે સાતેય પર આ આરોપ મૂક્યો હતો. બે યુવકો ઘટનાસ્થળેથી ત્વરિત નાસી ગયા હતા. તેમણે જણાવ્યું કે, પછી તેમણે અમને પાંચ જણાને પકડીને ખૂબ જ ઢોર માર માર્યો હતો અને અમને બળજબરીપૂર્વક જય શ્રીરામની નારેબાજી કરવા માટે મજબૂર કર્યા હતા. ઉલ્લેખનીય છે કે, ૨૦૦૫ના કાયદા અનુસાર ઝારખંડમાં ગૌહત્યા પર પ્રતિબંધ છે. તાજેતરના સમયમાં ભાજપના નેતૃત્વ હેઠળની રઘુવરદાસ સરકાર દ્વારા તેનું કડક રીતે પાલન કરવામાં આવી રહ્યું છે. જો કે, ગૌરક્ષકો દ્વારા કરાયેલા આ હુમલો તાજેતરનો નવો મામલો છે. આ દરમિયાન ૨૬ વર્ષીય દીપક કુલ્લુએ કહ્યું હતું કે, તેઓએ અમને ખરાબ રીતે માર માર્યો હતો. તેમણે અમારા અડધા વાળ કાપી નાખ્યા હતા, તેઓ અમને અપશબ્દો કહી રહ્યા હતા અને બળજબરીપૂર્વક જય શ્રીરામ પોકારવા મજબૂર કરી રહ્યા હતા. ઉલ્લેખનીય છે કે, દીપક કુલ્લુ પણ પાંચ પીડિતો પૈકી એક છે.