(એજન્સી) નવી દિલ્હી, તા.૨૧
ચીની જાસૂસી રેકેટમાં દિલ્હીની કોર્ટે પત્રકાર રાજીવ શર્મા, ચીનની મહિલા કિંગ શી અને નેપાળી નાગરિક શેરસિંઘને ૭ દિવસ માટે પોલીસ કસ્ટડીમાં મોકલી આપવા કોર્ટે આદેશ કર્યો છે. ત્રણેય આરોપીઓના રિમાન્ડ પુરા થતા એમણે કોર્ટ સમક્ષ રજૂ કરતા મુખ્ય મેટ્રોપોલીટન મેજિસ્ટ્રેટે બધાને પોલીસ કસ્ટડીમાં મોકલી આપ્યા હતા. ૧૪મી સપ્ટેમ્બરના રોજ દિલ્હી પોલીસના સ્પે. સેલે ૬૧ વર્ષીય ભારતીય પત્રકાર રાજીવ શર્માની ચીનના ગુપ્તચર વિભાગ માટે કાર્ય કરતા હોવાના આક્ષેપોના લીધે ધરપકડ કરાઈ હતી.
પીતમપુરામાં રાજીવ શર્માના ઘરના સર્ચ દરમિયાન એક લેપટોપ અને ઘણા બધા રક્ષા મંત્રાલય સાથે સંબંધ ધરાવતા વાંધાજનક દસ્તાવેજો મળી આવ્યા હતા. પોલીસ રિમાન્ડ દરમિયાન ચીનની મહિલા કિંગ શી અને એક નેપાળી નાગરિક શેરસિંઘની પણ ધરપકડ કરવામાં આવી હતી. તેઓ ગોપનીય માહિતી અને દસ્તાવેજો ચીનની ગુપ્તચર એજન્સીને મોકલતા હતા અને બદલામાં હવાલા દ્વારા પૈસા મેળવતા હતા. આ પૈસા મેળવવા માટે એમણે બનાવટી કંપનીઓ ઊભી કરી હતી.
થોડા દિવસો પહેલા માહિતી મળી હતી કે રાજીવ શર્માના સંબંધો વિદેશી ઇન્ટેલીજન્સ ઓફિસર સાથે છે અને તેઓ એમની પાસેથી ગેરકાયદેસર હવાલા અને વેસ્ટર્ન મની ટ્રાન્સફર દ્વારા મોટા પ્રમાણમાં પૈસા મેળવે છે અને એના બદલામાં દેશની સુરક્ષા સાથે સંકળાયેલ ગુપ્ત માહિતી મોકલાવે છે.
એમની સામે ઓફિશિઅલ સિક્રેટ એક્ટની કલમો ૩, ૪, ૫ હેઠળ ૧૩મી સપ્ટેમ્બરે કેસ નોંધવામાં આવ્યો હતો અને ૧૪મી સપ્ટેમ્બરના રોજ વોરંટ મેળવી એમના ઘરની તલાશી લેવાઈ હતી. પૂછપરછ દરમિયાન રાજીવ શર્માએ કબૂલ્યું હતું કે તેઓ ગોપનીય દસ્તાવેજો અને અન્ય માહિતી ચીનના હેન્ડલરને ડિજીટલ ચેનલ દ્વારા મોકલે છે. દરમિયાનમાં રાજીવે પોતાના વકીલ દ્વારા જામીન અરજી દાખલ કરી છે જેની સુનાવણી ૨૮મી એ થશે.