(એજન્સી) ,તા.૩
અમેરિકામાં ગત ૨૫મી મેએ અશ્વેત જ્યોર્જ ફ્લોઇડની હત્યા કરનારા પોલીસકર્મીના વિરોધમાં સમગ્ર દેશમાં વિરોધ પ્રદર્શનો ફાટી નીકળ્યાં છે અને ૭૫થી વધુ શહેરોમાં રંગભેદ નીતિ વિરૂદ્ધ ભયંકર દેખાવો થઇ રહ્યા છે. ઉલ્લેખનીય છે કે, નિર્મમ રીતે હત્યા નીપજાવવાનો વીડિયો બહાર આવતાં કેટલાક ગોરા અમેરિકનો પણ વિરોધ કરી રહ્યા છે ત્યારે જ્યોર્જ ફ્લોઇડની હત્યા કરનારા પોલીસ કર્મી ડેરેક ચૌવિનની પત્ની કૈલી મેએ આ ઘટનાનો વીડિયો જોયા બાદ પતિ પાસેથી છૂટાછેડા માગ્યા છે. જ્યોર્જ ફ્લોઇડની થર્ડ ડિગ્રી હત્યાના કેસમાં ૪૪ વર્ષના ડેરેક ચૌવિનને જેલમાં ધકેલી દેવાના બીજા જ દિવસે ૪૫ વર્ષની પત્ની કૈલી ચૌવિને છૂટાછેડા માગ્યા હતા. ડેરેક સાથે છેલ્લા ૧૦ વર્ષથી લગ્નજીવનથી બંધાયેલી કેલીએ આઠ પાનાની ડિવોર્સ અરજી લખી છે અને કહ્યું છે કે, તે પોતાની સરનેમ બદલવા માગે છે.