(એજન્સી) તા.૨૧
સરકારે જાહેરાત કરી છે કે, આગામી સોમવાર એટલે કે ૨૫ મેથી સ્થાનિક હવાઈ સેવાઓ શરૂ થશે. લોકડાઉનની શરૂઆત થયાના લગભગ બે મહિના પછી શરૂ થનાર આ સેવા માટે જરૂરી ગાઇડલાઇન્સ અને ર્જીંઁ અગાઉથી જાહેર કરવામાં આવી છે. એરપોર્ટ પર ફિઝિકલ ચેક ઇન નહીં થાય, આરોગ્ય સેતુ એપ જરૂરી છે અને સાથે કોઈ પણ વિમાન ત્રીજા ભાગની સેવા સાથે ઉડાન ભરી શકશે.
નાગરિક ઉડ્ડયન મંત્રી હરદીપ પુરીએ જણાવ્યું છે કે, સર્વસંમતિ સાથે અમે ૨૫ મેથી તબક્કાવાર રીતે વિમાન સેવા શરૂ કરીશું. ઉનાળાના શીડ્યુલ ૨૦૨૦ના હિસાબે દરેક વિમાન ત્રીજા ભાગના પ્રવાસીઓ સાથે ઉડાન ભરી શકશે. એ જ રીતે સાપ્તાહિક ડિપાર્ચરની મહત્તમ મર્યાદા ૧૦૦ હશે. આ વિમાનોમાં પ્રવાસ કરવાના ભાડાને લઈને હરદીપ પુરીએ જણાવ્યું છે કે, રુટને ૭ સેક્શનમાં વહેંચવામાં આવશે અને એના આધારે જ ભાડું લેવામાં આવશે. આ હિસાબે દિલ્હીથી મુંબઈ સુધી વિમાનમાં મુસાફરી કરવાનું લઘુતમ ભાડું રૂ. ૩૫૦૦ અને મહત્તમ ભાડું રૂ. ૧૦,૦૦૦ હશે, જે ૯૦ મિનિટથી ૧૨૦ મિનિટની કેટેગરીમાં આવે છે.
એરલાઇન્સ કંપનીઓને કોરોનાવાયરસને પગલે તમામ પ્રકારની સૂચનાઓ આપવામાં આવી છે, જેમ કે પીપીઈ સૂટ પહેરવું, સેનિટાઇઝેશન વગેરે. તેમાં એરટિકિટનું ભાડું ૨૦૦૦ રૂપિયાથી લઈને ૧૮,૬૦૦ રૂપિયાની વચ્ચે રહી શકે છે. આ સાત બેન્ડ પર આધારિત રહેશે જે આગામી ત્રણ મહિના સુધી નક્કી રહેશે.
રુટનાં સાત સેક્શન
• ૪૦ મિનિટથી ઓછો સમય લેતા રુટ
• ૪૦ મિનિટથી ૬૦ મિનિટના રુટ
• ૬૦ મિનિટથી ૯૦ મિનિટના રુટ
• ૯૦ મિનિટથી ૧૨૦ મિનિટના રુટ
• ૨ કલાકથી અઢી કલાકના રુટ
• અઢી કલાકથી ત્રણ કલાકનાં રુટ
• ત્રણ કલાકથી સાડા ત્રણ કલાકના રુટ
હરદીપ પુરીએ જણાવ્યું છે કે, અગાઉ એરલાઇન કંપનીઓ પોતાનું લઘુતમ અને મહત્તમ ભાડું પોતાની વેબસાઇટ પર આપતી હતી. હવે અમે રેલવેના ભાડાને ધ્યાનમાં રાખીને ભાડા નક્કી કરવાનું વિચાર્યું છે, જે રિયલિસ્ટ એટલે કે વાસ્તવિક છે. અમે વાસ્તવિક ભાડાનાં દર નક્કી કર્યા છે, જેથી કોઈ પણ બિઝનેસને મુશ્કેલીનો સામનો ન કરવો પડે. હરદીપ પુરીએ વચ્ચેની સીટ ખાલી રાખવા વિશે કહ્યું છે કે, પ્રવાસ દરમિયાન વચ્ચેની સીટ ખાલી છોડવામાં નહીં આવે. દરેક ઉડાન પછી વિમાનને ડિસઇન્ફેક્ટ કરવામાં આવશે. પ્રવાસીઓ અને ક્રૂ માટે તમામ પ્રકારની સાવચેતી રાખવામાં આવશે. જો વચ્ચેની સીટ ખાલી છોડવામાં આવે, તો એનો ભાર પ્રવાસીઓને ભોગવવો પડે.