દીવમાં મલાલા સર્કલ નજીક આઈઆરએમ એનર્જી દ્વારા પ્રથમ સીએનજી સ્ટેશનનો પ્રારંભ

કોડીનાર, તા.૧૩
આઈઆરએમ એનર્જી દ્વારા દીવમાં મલાલા સર્કલ પાસે ભારત પેટ્રોલિયમના “ગોવા પેટ્રોલિયમ” પર દીવના સૌપ્રથમ સીએનજી સ્ટેશનનો શુભારંભ કરવામાં આવ્યો છે. આ નવા સીએનજી સ્ટેશનનું ઉદ્‌ઘાટન દીવના કલેકટર સલોની રાઈના હસ્તે કરવામાં આવેલ હતું. આ સમારોહમાં દીવના અગ્રણી અધિકારીઓ, આઈઆરએમ એનર્જીના અધિકારીઓ તથા ભારત પેટ્રોલિયમના અધિકારીઓ પણ ઉપસ્થિત હતા. આ પ્રસંગે દીવ કલેક્ટર સલોની રાઈએ જણાવ્યું હતું કે, ગ્રીન દીવ ક્લીન દીવનું આ અમારૂ પ્રથમ પગલું છે અને આવનારા દિવસોમાં છ માસની અંદર ઘરેલું ગેસ પાઇપલાઇનથી પણ ગેસ આપવા માટે કટિબદ્ધ છે. સીએનજીના વપરાશથી વાતાવરણમાં પ્રદૂષણમાં પણ ઘટાડો થશે. અગાઉ ગીર સોમનાથ જિલ્લામાં આઈઆરએમ એનર્જી દ્વારા ૮ સીએનજી સ્ટેશન ચાલુ કરવામાં આવ્યા હતા. જેમાંથી વેરાવળ ખાતે ૩, ઉના ખાતે ૪ અને કોડીનાર ખાતે ૧ સીએનજી સ્ટેશન કાર્યરત છે. આવનારા ટૂંક સમય માં તાલાળા, સાસણ અને ધોકડવામાં પણ નવા સીએનજી સ્ટેશન શરૂ થશે. પર્યટન ક્ષેત્રમાં પ્રવાસન વધવાથી વ્યાપાર ધંધાને પણ પ્રોત્સાહન મળશે.