હું સારી કામગીરી કરી બતાવીશ : લાલજીભાઈ; મુખ્યમંત્રી બન્યા વગર પણ કરી શકાય : નીતિન પટેલ

(સંવાદદાતા દ્વારા)  અમદાવાદ, તા.રપ
નીતિનભાઈ મારે પણ ગુજરાતના એક દિવસના મુખ્યમંત્રી બનવું છે, તમે વિજયભાઈને વાત કરોને હું નાયક જેવું કામ કરી બતાવીશ અને તમારી સરકારની પણ સારી કામગીરી બોલશે, એમ ધોલેરા તાલુકાના હેબતપુર ગામના લાલજીભાઈ નામના શખ્સે નાયબ મુખ્યમંત્રી નીતિન પટેલને ફોન કરી એક દિવસના મુખ્યમંત્રી બનવાની ઈચ્છા વ્યક્ત કરતા નીતિન પટેલ હસી પડ્યા હતા.
ગુજરાતના એક યુવકે નીતિન પટેલને ફોન કરી એક દિવસના મુખ્યમંત્રી બનવાની ઈચ્છા વ્યક્ત કરી હતી. ગુજરાતના યુવકની નીતિન પટેલ સાથેની વાતચીતનો ઓડિયો વાયરલ થયો છે. ગુજરાતના યુવકની એક દિવસ માટે મુખ્યમંત્રી બનવાની ઈચ્છા જોઈ નીતિન પટેલે પણ શુભેચ્છા પાઠવી હતી. મહત્ત્વપૂર્ણ છે કે, ઉત્તરાખંડમાં સૃષ્ટી ગોસ્વામી નામની એક યુવતી એક દિવસ માટે મુખ્યમંત્રી બની હતી. ત્યારે ધોલેરા તાલુકાના હેબતપુરના લાલજીભાઈએ નાયબ મુખ્યમંત્રી નીતિન પટેલને ફોન કરીને એક દિવસના મુખ્યમંત્રી બનવાની વાત કરતા નીતિન પટેલ પણ હસી પડ્યા હતા. આ વાતચીતના કેટલાક અંશ નીચે પ્રમાણે છે.
લાલજીભાઈ : સાહેબ લાલજી બોલું છું, મીઠાપુરા, ધોલેરા તાલુકાના હેબતપુર ગામમાંથી, જેની વસ્તી ૧૦-૧૨ હજારની છે. જે રીતે ઉત્તરાખંડમાં સૃષ્ટી ગોસ્વામી નામના બહેનને એક દિવસના મુખ્યમંત્રી બનાવડાવ્યા, તેવી રીતે હું ગુજરાતનો એક દિવસનો મુખ્યમંત્રી બનવા માંગું છું.
નીતિન પટેલ (હસતા) : બનો કઈ વાંધો નહીં
લાલજીભાઈ : આમા આપણે સીએમ સાહેબની મંજૂરી જોઈએ, જો રૂપાણી સાહેબ એમ કહે કે, લાલજીભાઈને એક દિવસ માટે મુખ્યમંત્રી બનાવો.
નીતિન પટેલ (હસતા) : સારૂ..સારૂ..હો
લાલજીભાઈ : આપણે સારૂ કામ કરીશું અને કામગીરી પણ સારી કરીને બતાવીશું
નીતિન પટેલ : મુખ્યમંત્રી બન્યા વગર પણ સારા કામ કરી શકાય.
લાલજીભાઈ : જ્યાં સુધી સત્તા હાથમાં નથી
નીતિન પટેલ : મારી શુભેચ્છા
રાષ્ટ્રીય બાલિકા દિવસના પ્રસંગે ઉત્તરાખંડના હરિદ્વાર જિલ્લાની વિદ્યાર્થિની સૃષ્ટિ ગોસ્વામી એક દિવસની મુખ્યમંત્રી બની હતી. આ દરમિયાન તેણે વિવિધ વિભાગની સમીક્ષા બેઠક કરી હતી અને પ્રેજેન્ટેશન જોયું હતું. સૃષ્ટી પોતાના ૬ કલાકના કાર્યકાળમાં પૂરા આત્મવિશ્વાસથી ભરેલી જોવા મળી હતી. આ દરમિયાન તેણે અધિકારીઓની ક્લાસ પણ લીધી હતી અને વિપક્ષના સવાલોના જવાબ પણ આપ્યા હતા. આ ઘટનાથી તથા નાયક ફિલ્મથી પુરાઈને ગુજરાતના શખ્સે પણ એક દિવસના મુખ્યમંત્રી બનવાની ઈચ્છા વ્યક્ત કરતાં ફોન કરનારની વાત સાંભળી નાયબ મુખ્યમંત્રી હસવું રોકી શક્યા ન હતા.