(એજન્સી) તા.૧૮
ભારતના વાંધાને નજરઅંદાજ કરી નેપાળની સંસદના ઉપલા ગૃહ નેશનલ અસેમ્બલીએ દેશના વિવાદિત રાજકીય નકશાને લઈને ગુરૂવારે રજૂ કરાયેલા બંધારણ સંશોધન બિલને પોતાની મંજૂરી આપી દીધી છે.
આ દરમિયાન નેશનલ એસેમ્બલીમાં સત્તાધારી નેપાલ કોમ્યુનિસ્ટ પાર્ટીના સંસદીય પક્ષના નેતા દીનાનાથ શર્માએ કહ્યું કે, ભારતે લિપુલેખ, કાલાપાની અને લિમ્પિયાધુરા પર ગેરકાયદે કબજો કર્યો છે અને તેણે નેપાળની જમીન પાછી આપી દેવી જોઈએ. નેપાળના નવા નકશાના સમર્થનમાં નેશનલ એસેમ્બલીમાં ૫૭ વોટ પડ્યા અને વિરોધમાં કોઈએ વોટ ન આપ્યો. આ રીતે આ બિલ સર્વસંમત્તિથી પસાર થઈ ગયું નેશનલ અસેમ્બલીમાં વોટિંગ દરમિયાન સંસદમાં વિપક્ષ નેપાળી કોંગ્રેસ અને જનતા સમાજવાદી પાર્ટી-નેપાળે બંધારણની આ બિલનું સમર્થન કર્યુ. ભારત સાથે સરહદ વિવાદની વચ્ચે નવા નકશામાં લિપુલેખ, કાલાપાની અને લિમ્પિયાધુરાને નેપાળે પોતાના ક્ષેત્રમાં બતાવ્યા છે. કાયદો, ન્યાય અને સંસદીય મામલાના મંત્રી શિવમાયા થુમ્ભાંગફેએ દેશના નકશામાં ફેરફાર માટે સંસદમાં બંધારણ સંશોધન બિલ પર ચર્ચા માટે તેને રજૂ કર્યું હતું.
આ નવા નકશામાં નેપાળે લિપુલેખ, કાલાપાની અને લિમ્પિયાધુરાના કુલ ૩૯૫ વર્ગ કિલોમીટરના ભારતીય વિસ્તારને પોતાનો જણાવ્યો છે. ભારતે નેપાળના આ પગલાં સામે વાંધો ઉઠાવતા નકશાને મંજૂરી આપવાનો ઈનકાર કર્યો છે અને કહ્યું છે કે, તે માત્ર રાજકીય હથિયાર છે જેનો કોઈ આધાર નથી.