મેલબોર્ન, તા.૨૭
ઑસ્ટ્રેલિયાના ફાસ્ટ બોલર મિશેલ સ્ટાર્કે કહ્યું કે, બોલને ચમકાવવા માટે ઉપયોગ કરાતી લાળ પર પ્રતિબંધથી ક્રિકેટ ખૂબ કંટાળાજનક બની શકે છે. સ્ટાર્કે મંગળવારે કહ્યું કે, જો બોલ અને બેટની વચ્ચે ટક્કરનું સંતુલન નહીં બને તો રમતનો રોમાંચ ખતમ થઈ જશે. તેણે કહ્યું કે, આ નિર્ણય ભવિષ્યમાં ફાસ્ટ બોલિંગ કરવા ઇચ્છુક યુવાનોને પણ હતોત્સાહિત કરશે. સ્ટાર્કે કહ્યું કે, ‘અમે (બોલર) પોતાના મહત્ત્વમાં ઘટાડો અને એકતરફી મુકાબલો (બેટ્‌સમેનો સાથે) નથી ઈચ્છતા. આવામાં કંઈક કરવાની જરૂર છે જેથી બોલ સ્વિંગ થઈ શકે. જો આવું નહીં થાય તો લોકો ક્રિકેટ નહીં જુએ અને બાળકો બોલર બનવા માગશે નહીં. ઑસ્ટ્રેલિયામાં છેલ્લા કેટલાક વર્ષોમાં અમારી પિચો સપાટ થઈ છે અને જો બોલ સીધો જાય તો આ એક ખૂબ જ કંટાળાજનક સ્પર્ધા થશે.’ પૂર્વ ભારતીય કેપ્ટન અનિલ કુંબલેની આગેવાનીમાં આઈસીસી ક્રિકેટ સમિતિએ તાજેતરમાં જ કોરોના વાયરસના ખતરાથી નિપટવા માટે લાળના ઉપયોગ પર પ્રતિબંધ લગાવવાની ભલામણી કરી હતી. સ્ટાર્કને લાગે છે કે, બોલર્સને અત્યારે બોલને બીજી રીતે ચમકાવવાની પરવાનગી આપવી જોઈએ. તેણે કહ્યું કે, ‘હજુ દુનિયામાં પરિસ્થિતિઓ સામાન્ય નથી અને જો તે થોડા સમય માટે બોલ પર લાળના ઉપયોગને રોકવા માગે છે તો આ દરમિયાન અન્ય કોઈ પ્રકારની વસ્તુના ઉપયોગ વિશે વિચારવાની જરૂર છે.’ ગુલાબી બોલથી સૌથી વધુ વિકેટ ઝડપનારા બોલરોમાં સામેલ સ્ટાર્કે કહ્યું કે, ભારત વિરુદ્ધ આગામી ઘરેલુ સિરીઝમાં ડેનાઈટ ટેસ્ટ રમવાની તે રાહ જોઈ રહ્યો છે. ઑસ્ટ્રેલિયન ટીમ ૨૦૧૫થી ડે-નાઈટ ટેસ્ટ રમી રહી છે પણ ભારતે ગુલાબી બોલથી એક જ ટેસ્ટ રમી છે. આવામાં ઓસ્ટ્રેલિયાનું પાસું મજબૂત હોવાના સવાલ પર સ્ટાર્કે કહ્યું કે, ‘ભારત પોતાના ઘરમાં ગુલાબી બોલથી રમ્યું છે. આવામાં તેમના માટે આ સંપૂર્ણ રીતે નવું નથી. જ્યાં સુધી પલડાની વાત છે તો ઘરેલું મેચોમાં ગુલાબી બોલથી અમારો રેકોર્ડ શાનદાર છે.