બોલ ટેમ્પરિંગ વિવાદ : ભાંગી પડેલા સ્મિથે કહ્યું મારા નેતૃત્વની નિષ્ફળતા હતી

સિડની, તા.ર૯
બોલ ટેમ્પરીંગ વિવાદ પર ઓસ્ટ્રેલિયન ક્રિકેટ ટીમનો કપ્તાન સ્ટીવ સ્મિથ પત્રકાર પરિષદ દરમ્યાન ભાવુક થઈ ગયો તેણે કહ્યું કે, તમે મને માફ કરો હું તમને એ બતાવવા માંગુ છું કે, ઓસ્ટ્રેલિયન ક્રિકેટ ટીમના કપ્તાનના રૂપમાં આની પૂરી જવાબદારી લઉ છું. સ્મિથે કહ્યું કે, મેં એક ખૂબ જ ખોટો નિર્ણય કર્યો જેના પરિણામ મને સમજાઈ રહ્યા છે. આ દરમ્યાન સ્મિથ અનેકવાર રડી પડ્યો અને રડતાં રડતાં જ તેણે પત્રકાર પરિષદને અલવિદા કહ્યું. સ્મિથે કહ્યું કે, સારા લોકો પણ ભૂલો કરે છે મેં પણ મોટી ભૂલ કરી છે અને આ બધું થવા દીધું મેં નિર્ણય લેવામાં ભૂલ કરી. પૂર્વ ઓસી. કપ્તાને રડતાં રડતાં કહ્યું કે, મારી જાણકારીમાં આ પહેલીવાર થયું છે હું તમને આ વાતથી અશ્વસ્ત કરી શકું છું કે, આવું ફરીવાર નહીં થાય, હું ઓસી. ટીમનો કપ્તાન હતો. આ બધું મારી સામે થયું હું આ ઘટનાની પૂરી જવાબદારી લઉ છું, પત્રકાર પરિષદ સમાપ્ત કરતાં પહેલાં સ્મિથે કહ્યું હું ખૂબ જ શરમજનક સ્થિતિમાં છું આ ઘટના ખૂબ જ દુઃખ આપનારી છે આ મને ઘણી તકલીફ આપે છે ઓસ્ટ્રેલિયન ક્રિકેટ પ્રેમીઓને મેં જે પીડા આપી છે તેના માટે હું દિલથી માફી માંગુ છું.
જીવનભર આ વાતનો પસ્તાવો રહેશે : બેનક્રાફટ
બોલ ટેમ્પરીંગ માટે ચારેબાજુથી ટીકાનો સામનો કરી રહેલા ઓસી.ના યુવા બેટ્‌સમેન કેમરૂન બેનક્રાફટ કહ્યું છે કે ઘટનાનો ખુલાસો થયા બાદ તે ખૂબ જ ડરી ગયો હતો. એટલા માટે તે જુદું બોલ્યો બેનક્રાફટ આ ભૂલ માટે બધાની માફી માંગી છે. તેણે કહ્યું કે, હું માફી માંગવા માંગુ છું ખાસ કરીને બાળકોની તે બધા લોકોની જેમને મેં નિરાશ કર્યા છે. મને જીવનભર આ વાતનો પસ્તાવો રહેશે હાલ હું ફક્ત માફી માટે કહી શકું છું.