(એજન્સી) હૈદરાબાદ, તા.૨૨
ફિલ્મ પદ્માવતીને લઈને વિવાદમાં ઘેરાયેલ બોલિવૂડની અભિનેત્રી દિપીકા પાદુકોણે ગ્લોબલ એન્ટપ્રિનિયોરશીપ સમિટ (જીઈએસ)માંથી પોતાનું નામ પાછું ખેંચી લીધું છે. ૨૮ નવે. હૈદરાબાદ ખાતે યોજાનારી આ સમિટમાં વડાપ્રધાન મોદી ઉપરાંત અમેરિકાના રાષ્ટ્રપ્રમુખ ડોનાલ્ડ ટ્રમ્પની પુત્રી ઈવાન્કા જેવી હસ્તીઓ સામેલ થનાર છે. તેલંગાણા સરકારના એક વરિષ્ઠ અધિકારીએ જણાવ્યું હતું કે, દિપીકાએ આ ઈવેન્ટમાંથી પોતાનું નામ પાછું ખેંચી લીધું છે. અધિકારીએ એવું પણ જણાવ્યું છે કે, આ ઈવેન્ટમાંથી નામ પાછું ખેંચી લેવાના કારણ અંગે તેમને કોઈ જાણકારી નથી. અત્રે ઉલ્લેખનીય છે કે, આ સમિટમાં દિપીકા ‘હોલિવૂડ ટુ નોલિવૂડ ટુ બોલિવૂડ : ધ પાથ ટુ મૂવી મેકિંગ’ પર પોતાનું વક્તવ્ય અને અભિપ્રાય રજૂ કરવાની હતી. અત્રે ઉલ્લેખનીય છે કે, નાઈજીરિયાની ઈન્ડસ્ટ્રીને નોલિવૂડના નામથી ઓળખવામાં આવે છે. દિપીકાએ આ નિર્ણય ત્યારે લીધો છે જ્યારે દેશભરમાં તેમની ફિલ્મ પદ્માવતીનો વિરોધ કરવામાં આવી રહ્યો છે અને એવું કહેવાય છે કે, દિપીકાએ પોતાનો નિર્ણય આટલા માટે કદાચ બદલ્યો છે. આ ફિલ્મનો રાજપૂત સંગઠનો શરૂઆતથી જ વિરોધ કરી રહ્યા છે. એક બાજુ કેટલાય રાજકીય પક્ષો આ ફિલ્મની વિરૂદ્ધ છે તો બીજી બાજુ અખિલ ભારતીય ક્ષત્રિય યુવા મહાસભા તરફથી દિપીકા અને સંજયલીલા ભણસાલીના માથા વાઢવા માટે પ કરોડ સુધીના ઈનામની પણ જાહેરાત કરવામાં આવી છે. અમેરિકા અને ભારત દ્વારા સંયુક્ત રીતે યોજવામાં આવેલ ગ્લોબલ એન્ટરપ્રિનિયોરશીપ સમિટનું વિષયવસ્તુ છે ‘વુમન ફર્સ્ટ પ્રોસ્પેરિટી ફોર ઓલ’ આ સમિટમાં દુનિયાભરમાંથી પ૦૦ જેટલા ઉદ્યોગ સાહસિકો અને રોકાણકારો ભાગ લઈ રહ્યા છે. અમેરિકાના પ્રમુખ ડોનાલ્ડ ટ્રમ્પના પુત્રી ઈવાન્કા ટ્રમ્પ અને વડાપ્રધાન નરેન્દ્ર મોદી ૨૮ નવે.ના રોજ આ સમિટના ઉદ્‌ઘાટન સમારોહમાં હાજરી આપશે.