(સંવાદદાતા દ્વારા) મોડાસા, તા.ર૭
જર, જમીન અને જોરૂના ઝઘડામાં અનેક રક્ત રંજીત ઘટનાઓ બની છે. ભિલોડા તાલુકાના કુંડોલ (પાલ) ગામે એક જ શેઢા પર જમીન હત્યાનું કારણ બની હતી. ૪ શખ્સોએ બે મહિલાઓ સાથે મળી સેઢા પાડોશી યુવકને ઢોર માર મારી બે શખ્સોએ યુવકને કૂવામાં નાખી દઈ હત્યા કરી દેતા ચકચાર મચી હતી. એકના એક પુત્રની હત્યા થઈ જતાં ઘરનો કુળદીપક ઓલવાઈ જતા ખેડૂતના માથે આભ તૂટી પડ્યું હતું.કુંડોલ (પાલ) ગામમાં રહેતા રમેશભાઈ ધનજીભાઈ તરાર અને તેમનો ૨૨ વર્ષીય પુત્ર નવીન ખેતી કરી જીવનનિર્વાહ ચલાવતા હતા. તેમની જમીનની બાજુમાં મુકેશ ધીરુભાઈ ડામોરની જમીન આવેલી છે. બંનેની જમીન વચ્ચે આવેલ શેઢાના લીધે બંને પરિવારોમાં વિવાદ ચાલતો હતો. સોમવારે રાત્રે મુકેશ ધીરુભાઈ ડામોર અને તેનો પુત્ર પ્રિન્સ ડામોર લાકડીઓ સાથે ધસી આવી શેઢા પર તારે આવવું નહીં કહી બેફામ ગાળો બોલવાની સાથે લાકડીઓ વડે તૂટી પડ્યા હતા. ત્યારે પુત્રને બચાવવા રમેશભાઈ વચ્ચે પડતા નવીન જીવ બચાવી ભાગતા માથા પર જાણે ઝનૂન સવાર હોય તેમ નવીનની પાછળ દોડી નજીકમાં આવેલા પાણી ભરેલા કૂવામાં નવીનને નાખી દીધો હતો. ત્યારબાદ પરત ફરી રમેશભાઈને પણ જમીન ખાલી કરી દેવાની અને મારી નાખવાની ધમકી આપી આરોપીઓ ફરાર થઈ ગયા હતા. પુત્રની હત્યાના પગલે બેબાકળા બનેલા પિતાએ ગામના સરપંચ અને ગ્રામજનોને જાણ કરી હોવા છતાં કોઈ મદદમાં ન આવતા રાત્રીનો સમય ભયમાં પસાર કરી મંગળવારે ભિલોડા પોલીસને જાણ કરતા ભિલોડા પોલીસે ઘટનાસ્થળે પહોંચી મૃતક યુવકની લાશને પીએમ માટે ખસેડી હતી.
ભિલોડા પોલીસે ફરિયાદના આધારે મુકેશભાઇ ધીરૂભાઇ ડામોર, પ્રિન્સ મુકેશભાઇ ડામોર, પ્રિન્કલ કિરીટભાઇ ડામોર, ટીંકલ કિરીટભાઇ ડામોર, સંગીતાબેન મુકેશભાઇ ડામોર અને આશાબેન કિરીટભાઇ ડામોર (રહે.તમામ કુંડોલ-પાલ સુંદરપુર) વિરૂદ્ધ ગુનો નોંધી ફરાર હત્યારાઓને ઝડપી પાડવા ચક્રો ગતિમાન કર્યા છે.