અમદાવાદ, તા.૨૩
અમદાવાદ મ્યુનિસિપલ કોર્પોરેશનની નવી હદમાં બોપલનો સમાવેશ થયા બાદ એએમસીએ બોપલ જીઈબી સ્ટેશનની નજીક આવેલ કચરાના ડુંગરને આ વર્ષના અંત સુધીમાં દૂર કરવાનું નક્કી કર્યું છે. કોર્પોરેશનના અધિકારીઓનું કહેવું છે કે આ વિસ્તાર વ્યવસાયીક શક્યતાઓ ધરાવે છે. ૬ એકરનો આ પ્લોટ ૧૦૦થી ૧૫૦ કરોડ જેટલી માતબર રકમ કોર્પોરેશનને અપાવી શકે છે. કેમ કે અહીં નજીકમાં જ ઇસરોનું ગેસ્ટ હાઉસ, અનેક રેસિડેન્શિયલ કોલોની અને સ્કૂલ આવેલી છે. આ કારણે કોર્પોરેશને નિર્ણય લીધો છે કે આ જગ્યાએ રહેલા ૩ લાખ ટન કચરાને દૂર કરીને પ્લોટને કચરા મુક્ત કરવામાં આવશે. આ માટે કોર્પોરેશન બાયો માઇનિંગ પ્રોજેક્ટ અંતર્ગત તમામ કચરાનો નિકાલ કરશે. આગામી ૧૫ દિવસમાં જ આ જગ્યાને સમતળ કરી દેવામાં આવશે જેથી પ્રોજેક્ટ શરું કરી શકાય અને જલ્દીથી કચરાના ઢગલાને દૂર કરી શકાય. કચરાનો ડુંગર દૂર થતા જ આ વિસ્તારમાં જમીનના ભાવમાં પણ વધારો જોવા મળી શકે છે. અમદાવાદ મ્યુનિસિપલ કોર્પોરેશન આ જગ્યાએ ૩ ટ્રોમેલ મશિનનો ઉપયોગ કરવાની વિચારણા કરી રહી છે. જેથી આગામી વર્ષના પ્રારંભ સુધીમાં બોપલમાં આવેલ આ કચરાનો ડુંગર સંપૂર્ણપણે નિકાલ કરી શકાશે. મહત્વનું છે કે આ ડમ્પિંગ યાર્ડમાં આજુબાજુના વિસ્તારમાંથી સતત કચરો ઠલવાતો હોવાથી કચરાનો ડુંગર ૮ ફૂટ જેટલો ઉંચો બની ગયો હતો. જોકે થોડા મહિના પહેલા અહીં કચરાનું રિસાયકલિંગ અને નિકલ કરવા માટે એક ટ્રોમેલ મશીન મુકવામાં આવ્યું હતું જેની મદદથી આ ડુંગરને ૮ ફૂટથી ૪ ફૂટ સુધી લાવવામાં સફળતા મળી છે.