મોરબી, તા.ર૬
મોરબીના સીરામીક ઝોન જેતપર પીપળી રોડ ઉપર હમણાંથી ટ્રાફિકજામની સમસ્યા કાયમી બની છે. આથી, રોજેરોજના ટ્રાફિકજામમાં સ્થાનિક ઉદ્યોગકારો અને મજૂરો કલાકો સુધી ફસાઈ જાય છે. રોજેરોજની આ ટ્રાફિકજામની સમસ્યા ઉકેલવામાં સંબંધિત તંત્ર નિષ્ફળ જતા અંતે આજે સ્થાનિક ઉદ્યોગકારો અને મજૂરોએ જેતપર રોડ ઉપર ચક્કાજામ સર્જી દીધો હતો. મોરબીના સીરામીક ઝોન જેતપર પીપળી રોડની પથારી ફરી ગઈ છે. આ આખો રોડ ધોવાઈ ગયો છે. જેતપર રોડ ખાડાના અખાડામાં ફેરવાઈ જતા વાહન ચાલકોને ભારે મુશ્કેલીનો સામનો કરવો પડે છે. રોડમાં ખાડાખબડા હોવાથી અકસ્માતથી બચવા વાહનો ધીમી ગતિએ ચાલતા હોવાથી દરરોજ જેતપર રોડ ઉપર ટ્રાફિકની અંધાધુધી સર્જાઈ છે. દરરોજ ટ્રાફિકજામ થવાથી જેતપર રોડ ઉપર આવેલ સીરામીક ફેકટરીમાં કામ અર્થે આવતા ઉદ્યોગકારો તેમજ મજૂરો ટ્રાફિકજામમાં ફસાઈ જાય છે અને ભારે હાલાકી પડે છે. હમણાંથી આ ટ્રાફિકજામની સમસ્યા વકરી હોવા છતાં સંબંધિત તંત્રએ કોઈ કાર્યવાહી ન કરતા રોષે ભરાયેલા ઉદ્યોગકારો અને શ્રમિકોએ જેતપર રોડ ઉપર ચક્કાજામ કરીને વિરોધ પ્રદર્શન કર્યું હતું.