(સંવાદદાતા દ્વારા) વડોદરા તા.૩૦,
શહેરમાં પીવાનું પાણી દુર્ગંધવાળુ અને ગંદુ આવવાની તેમજ હળવા દબાણથી મળતું હોવાની ફરિયાદો વધતી જઇ રહી છે. દુષિત પાણીમાં મહાનગર પાલિકાનું વહીવટી તંત્ર હજુ પણ સુધારો કરી શકયો નથી. મહાનગર પાલિકાનાં તંત્રએ લીધેલા પાણીનાં નમુના પૈકી વધુ ૩૨ નમુના ફેઇલ થયા હતા. પાણીમાં ગટરનું પાણી મિશ્રીત હોવાનું બહાર આવ્યું હતું.શહેરમાં ચોમાસા અગાઉ પૂર્વ વિસ્તારમાં દુષિત પાણી મામલે ભારે હોબાળો થવા પામ્યો છે. સ્થાનિક લોકોએ મહાનગર પાલિકા તંત્ર સામે રોષ પણ ઠાલવ્યો છે. મહાનગર પાલિકાના તંત્રએ ટાંકીઓનાં સંપ સહિતની કામગીરી કરી હોવા છતા લોકોને હજુ પણ દુષિત પાણી મળી રહ્યું છે. ચોમાસુ શરૂ થઇ ગયું છે અને ચોમાસા દરમિયાન પાણીજન્ય રોગચાળો ફાટી નિકળે તેમ છે. દિન પ્રતિદિન અસરગ્રસ્ત વિસ્તારમાં લોકોનો આક્રોશ વધતો જઇ રહ્યો છે. જેથી પાલિકાના તંત્ર દ્વારા પાણીનાં નમુના લેવામાં આવ્યા હતા. પરંતુ ૩૨ નમુના ફેઇલ થયા હતા. પાલિકાના સેનેટરી, પબ્લીક હેલ્થ લેબોરેટરી અને એન્જિનીયરીંગ વિભાગે શહેરના ૩ ઝોનમાં લીધેલા નમુના પૈકી આ વખતે પશ્ચિમ ઝોનમાં સૌથી વધુ પાણીનાં નમુના ફેઇલ થયા હતા. પશ્ચિમ ઝોનમાં લીધેલા ૧૦૯ નમુના પૈકી ૧૬, પૂર્વ ઝોન ૪૧ પૈકી ૧૩ જ્યારે ઉત્તર ઝોન ૧૪૦ પૈકી ૩ નમુના ફેઇલ થયા હતા. જ્યારે દક્ષિણ ઝોનમાં લેવામાં આવેલા ૭૦ પૈકી એક પણ નમુનો ફેઇલ થયો ન હતો. આમ સૌથી વધુ ગંદુ પાણી પૂર્વ ઝોન અને પશ્ચિમ ઝોનમાં આવી રહ્યું છે. વરસાદીની સીઝન પણ જામવા લાગી છે. ફેઇલ થયેલા નમુનામાં ગટરનું પાણી મિશ્રીત હોવાનું જાણવા મળ્યું છે. તેમજ કલોરીનની માત્રા પણ મળી આવી નથી. જેથી આગામી દિવસોમાં આ વિસ્તારોમાં પાણીજન્ય રોગચાળો વકરે તેવું લાગી રહ્યું છે.