(સંવાદદાતા દ્વારા)
વડોદરા, તા.૯
સાત વર્ષ બાદ વડોદરાનાં આઇપીસીએલ ગ્રાઉન્ડ ઉપર ભારત અને ઓસ્ટ્રેલીયાની આંતરરાષ્ટ્રીય મહિલા ક્રિકેટ ટીમ વચ્ચે આગામી તા.૧૨,૧૫,૧૮ માર્ચનાં રોજ ત્રણ વન-ડે મેચો રમાશે. મહિલા ક્રિકેટને પ્રોત્સાહન આપવા માટે તા.૧૨મીનાં રોજ ગ્રાઉન્ડ ઉપર પાંચ થી છ હજાર મહિલાઓની માનવ સાંકળ રચવામાં આવશે. જેમાં શહેરની શાળાઓની વિદ્યાર્થીઓની અને સામાજિક સંસ્થાઓ જોડાશે. આ ત્રણ મેચની સીરીઝનું ૪૨ ઉપરાંત દેશોમાં લાઇવ પ્રસારણ કરવામાં આવનાર છે. તેમ બરોડા ક્રિકેટ એસોસીએશનનાં સેક્રેટરી સ્નેહલ પરીખે માહિતી આપતા જણાવ્યું હતું. તેમણે વધુમાં જણાવ્યું હતું કે, વડોદરાને સાત વર્ષ બાદ આંતરરાષ્ટ્રીય કક્ષાની ક્રિકેટ મેચ મળી છે. જે બીસીએ અને વડોદરા માટે ગૌરવની વાત છે. તા.૧૨,૧૫,૧૮ નાં રોજ ભારત અને ઓસ્ટ્રેલીયા મહિલા ટીમ વચ્ચે રમાનાર વન-ડે ક્રિકેટ સીરીઝનાં સફળ આયોજન માટે વિવિધ ૧૫ કમિટીની રચના કરવામાં આવી છે. વર્લ્ડ કપમાં ભારતની મહિલા ટીમે કરેલા જોરદાર પ્રદર્શનના પગલે મહિલા ક્રિકેટનો ક્રેઝ વધ્યો છે. વડોદરામાં પણ મહિલા ક્રિકેટ ટીમને પ્રોત્સાહન મળે તે માટે શહેરની શાળાઓની વિદ્યાર્થીનીઓને મેચ જોવા માટે લાવવાનું આયોજન કરવામાં આવ્યું છે. જ્યારે વિકલાંગ યુવતીઓ અને બાળકોને પણ આ સીરીઝ જોવા મેદાન પર લાવવા સામાજિક સંસ્થા દ્વારા પ્રયત્નો હાથ ધરાશે. ભારતીય ક્રિકેટ ટીમનાં કોચ વડોદરાના જ પૂર્વ રણજી ક્રિકેટર તુષાર અરોઠે છે. જેઓ વડોદરાના મેદાનથી વાકેફ હોવાથી ભારતીય ટીમને મદદ મળી રહેશે. ભારત-ઓસ્ટ્રેલીયા વચ્ચેની આ સીરીઝનો તમામ ખર્ચ બીસીસીઆઇ દ્વારા રૂા.૧ કરોડનું ફંડ ફાળવામાં આવ્યું છે. અત્યાર સુધી માત્ર પુરૂષ ક્રિકેટ સીરીઝ માટે બીસીસીઆઇ દ્વારા ફંડ ફાળવવામાં આવતું હતું. જ્યારે આ સૌપ્રથમ વખત થઇ રહ્યું છે. તે મહિલા ક્રિકેટ સીરીઝ માટે બીસીસીઆઇ ફંડ ફાળવી રહી છે તે ખુબ સારી બાબત છે તેમ એમ બીસીએની મેનેજીંગ કમિટીનાં સભ્ય અમર પેટીવાલાએ જણાવ્યું હતું.