(સંવાદદાતા દ્વારા)
વડોદરા, તા.૧૪
સાવલી પોલીસ સ્ટેશનમાં ફરજ બજાવતી રર વર્ષની મહિલા પોલીસ કોન્સ્ટેબલે ગળેફાંસો ખાઈને આત્મહત્યા કરી લેતા ચકચાર મચી ગઈ છે. વડોદરા જિલ્લાના સાવલી પોલીસ સ્ટેશનમાં ફરજ બજાવતી રર વર્ષની મહિલા પોલીસ કોન્સ્ટેબલ શિલ્પાબેન વિનોદસિંહ દરબાર સાવલીની બી-૧૦, ગોકુલવાટિકા સોસાયટીમાં ભાડેથી એકલી રહેતી હતી. શિલ્પાએ ગત રાત્રી દરમિયાન પોતાના ઘરમાં જ ગળે ફાંસો ખાઈને આપઘાત કરી લીધો હતો. જો કે, ઘરમાં કોઈ ન હોવાથી આજે સવારે ઘટનાની જાણ થઈ હતી. ઘટનાની જાણ થતા જ સાવલી પોલીસ ઘટના સ્થળે દોડી ગઈ હતી અને આ મામલે તપાસ હાથ ધરી હતી.
સાવલી પોલીસ સ્ટેશનની મહિલા પોલીસ કોન્સ્ટેબલ શિલ્પાબેન દરબારે કયા કારણોસર આત્મહત્યા કરી તે હજી સુધી જાણી શકાયું નથી. પોલીસે તેના પરિવારજનો અને પાડોશીઓની પૂછપરછ કરીને આત્મહત્યાનું કારણ જાણવાની દિશામાં તપાસ હાથ ધરી છે.