(સંવાદદાતા દ્વારા)
અમદાવાદ, તા.૭
ગુજરાત હાઈકોર્ટે એક હત્યાના આરોપીને પવિત્ર રમઝાન મહિનામાં રોજા રાખવા માટે હંગામી જામીન આપી દીધા છે. તેણે ૨૫ મેના રોજ ઈદ-ઉલ-ફિત્ર બાદ જેલમાં શરણાગતિ લેવી પડશે.
આ કેસમાં મુન્દ્રાના સોહિલ કાકલ (૨૧) સામેલ છે, જે હાલમાં મે ૨૦૧૭થી કચ્છ જિલ્લાના ગાંધીધામ નજીકની જિલ્લા જેલમાં બંધ છે. તેણે હાઈકોર્ટને ૩૦ દિવસના જામીન પર મુક્ત કરવા વિનંતી કરી છે જેથી તે રમઝાન દરમિયાન ઉપવાસ કરી શકે. કાકલે તેમની જામીન અરજીમાં રજૂઆત કરી હતી કે, ‘રમઝાન જે મુસ્લિમોનો પવિત્ર મહિનો છે અને તે આધ્યાત્મિક પ્રતિબિંબ, સ્વ-સુધારણા અને ભક્તિ અને ઉપાસનાનો સમય છે, તે દરમિયાન અરજદારે સવારથી સૂર્યાસ્ત સુધી કડક ઉપવાસ કરવો પણ જરૂરી છે, જેમાં કોઈપણ પ્રકારના ખોરાક અથવા પ્રવાહી લઈ શકાતા નથી અને આ માટે, રોજદારને ફળો અને અન્ય ખોરાક હોવો જરૂરી છે જે ઉપવાસ માટે બાકીના દિવસ માટે ઉર્જા પ્રદાન કરી શકે છે.’ તેમણે વધુમાં રજૂઆત કરી હતી કે, ‘રમઝાનના આ મહિનામાં, જેલ પરિસરમાં આવા ઉપવાસ કરવો અશક્ય છે કારણ કે જેલ પરિસરમાં અસંખ્ય પ્રતિબંધો છે.’ આ ઉપરાંત તેમના એડવોકેટે કોર્ટને જણાવ્યું હતું કે, કકલ ઇલેક્ટ્રિશિયન છે અને તે કામ કરી શકે છે અને તેના પરિવાર માટે કમાણી કરી શકે છે કારણ કે કોવિડ-૧૯ રોગચાળાને લીધે આ લોકડાઉન દરમિયાન ઇલેક્ટ્રિશિયનને કામ કરવાની મંજૂરી આપવામાં આવી છે. વકીલે તેના સારા વર્તનને પણ ટાંક્યું અને જેલ ઓથોરિટી દ્વારા જારી કરાયેલું તેનું પ્રમાણપત્ર રજૂ કર્યું. એવી રજૂઆત પણ કરવામાં આવી હતી કે ભૂજની અદાલતે અસ્થાયી જામીન માટેની તેમની વિનંતીને નકારી કાઢી હતી, પરંતુ લોકડાઉન પ્રતિબંધોને કારણે ઓર્ડરની નકલ ઉપલબ્ધ થઈ શકી ન હતી. તદ્‌ઉપરાંત, તેણે પોતાની નિર્દોષતા સાબિત કરવા માટે કોર્ટને તેના ઉપર નાર્કો વિશ્લેષણ કરવા વિનંતી પણ કરી હતી. તેમની વિનંતી સ્વીકારવામાં આવી હતી અને કોર્ટે આ આદેશ કર્યો હતો. તે ટ્રુથ સીરમ ટેસ્ટ માટેની તારીખની રાહ જોઈ રહ્યો હતો, પરંતુ દેશ લોકડાઉન લાગુ થઈ ગયું હતું.