(એજન્સી) ઉજ્જૈન, તા.૯
ઉત્તરપ્રદેશના કાનપુર જિલ્લામાં આઠ-આઠ પોલીસની હત્યા મામલે ઝડપાયેલા વિકાસ દુબેએ ધરપકડ બાદ બૂમો પાડી હતી કે ‘‘હું કાનપુરવાળો વિકાસ દુબે છું’’. દુબેની આ હરકતથી ઉશ્કેરાયેલી પોલીસે તેને લાફો ઝીંકી દીધો હતો. આ ઘટનાનો વીડિયો પણ વાયરલ થયો હતો. વીડિયોમાં વિકાસ દુબે બૂમો પાડતો અને ત્યારબાદ પોલીસે તેને લાફો માર્યાનું જોઈ શકાતું હતું. મધ્યપ્રદેશના મુખ્યમંત્રી શિવરાજસિંહ ચૌહાણે ટ્વીટ કરી માહિતી આપી હતી કે, ઉજ્જૈન પોલીસને અભિનંદન, તેમણે વિકાસ દુબેની ધરપકડ કરી હતી. ચૌહાણે જણાવ્યું હતું કે, આ મામલે તેમણે ઉત્તરપ્રદેશના પોતાના સમકક્ષ યોગી આદિત્યનાથ સાથે વાત કરી હતી. દુબેને ઉત્તરપ્રદેશ પોલીસને સોંપાશે.