(સંવાદદાતા દ્વારા) સુરત, તા.૧૫
બમરોલી રાયકા સર્કલ પાસેથી રાત્રિના સમયે એક એક્ટિવા પર પરિણીતા અને તેની સાસુ ફોઈ પસાર થઈ રહ્યા હતા. ત્યારે બાઈક પર આવેલા બે લૂંટારૂઓએ એક્ટિવાને લાત મારી બંનેને નીચે ફેંકી દીધા હતા. ત્યારબાદ મોબાઈલ અને પર્સની લૂંટ કરી લૂંટારૂઓ ભાગી છૂટ્યા હતા. બંને જણાને ઈજા પહોંચતા સારવાર માટે હોસ્પિટલમાં ખસેડાયા હતા. જો કે, સામાન્ય ઈજા હોવાને કારણે તેમને રજા આપી દેવામાં આવી હતી.
પ્રાપ્ત માહિતી અનુસાર શહેરના ઉધના મેઈન રોડ ચંદ્રદીપ સોસાયટીના પટેલનગરમાં રહેતા જયવિજય નાગર જમીન દલાલીના ધંધા સાથે સંકળાયેલા છે. તા.૧૧મી મેના રોજ રાત્રિના સવા ૧૨ વાગ્યાના અરસામાં જયની પત્ની અને તેમની ફોઈ એક્ટિવા પર સવાર થઈ ઘરે આવી રહ્યા હતા. ત્યારે બમરોલી રાયકા સર્કલ પાસેથી પસાર થઈ રહ્યા હતા. તે વખતે બાઈક પર ત્રાટકેલા બે લૂંટારૂઓએ એક્ટિવાને પાછળથી લાત મારી બંનેને નીચે ફેંકી દીધા હતા. પરિણામે નીચે પટકાતા બંને મહિલાઓને ઈજા પહોંચી હતી. આ જોઈને લૂંટારૂઓએ પોતાની બાઈક ઊભી રાખી પરિણીતાના હાથમાંથી રોકડા રૂા.૪ હજાર ભરેલું પર્સ અને ફોઈના હાથમાંથી રૂા.૫ હજારનો મોબાઈલ લૂંટીને અંધારાનો લાભ લઈ ધૂમ સ્ટાઈલમાં ભાગી છૂટ્યા હતા. બીજી બાજુ બંને મહિલાઓએ મદદ માટે બૂમાબૂમ કરી મૂકી હતી. પરંતુ લોકો મદદે આવે તે પહેલાં લૂંટારૂઓ રફૂચક્કર થઈ ગયા હતા. ત્યારબાદ ઈજાગ્રસ્ત મહિલાઓને નજીકની હોસ્પિટલમાં સારવાર આપવામાં આવી હતી. આ ઘટનાની જાણ પરિવારજનોને થતા તેઓ દોડી આવ્યા હતા. આ બનાવ સંદર્ભે છેવટે જયભાઈ નાગરે ખટોદરા પોલીસ મથકમાં ફરિયાદ નોંધાવી હતી. પોલીસે ગુનો નોંધી તપાસ હાથ ધરી હોવાનું જાણવા મળે છે.
