(સંવાદદાતા દ્વારા) જૂનાગઢ, તા.ર૭
જૂનાગઢના મધ્યમાં આવેલ જૂનાગઢ ડિસ્ટ્રીક્ટ એન્ડ સેસન્સ કોર્ટ સંકુલમાં આજે બપોરે બનેલી એક ચકચારી ઘટનામાં એક કુખ્યાત શખ્સે કોર્ટની ઈમારતની અંદર જ ઉશ્કેરાઈ જઈ ફરજ પરના પોલીસ કોન્સ્ટેબલને છરી મારી દેતા ઈજાગ્રસ્ત પો.કો.ને સારવાર માટે જૂનાગઢ મેડિકલ કોલેજની નવી સિવિલ હોસ્પિટલમાં દાખલ કરવામાં આવેલ છે.
આ સનસનીખેજ બનાવની વિગત મુજબ આજે કોર્ટની તારીખમાં પોલીસ જાપ્તા પાર્ટીના પોલીસ કોન્સ્ટેબલ જગદીહ રામભાઈ આહિર (અનાર્મ પો.કો.) પોતાના ફરજ બજાવી રહ્યા હતા ત્યારે મોહસીન મલેક ઉર્ફે હોલેહોલે નામનો કુખ્યાત શખ્સ કોર્ટ સંકુલમાં આવ્યો હતો અને કેટલાક અંડર ટ્રાયલ કેદીઓને મળવાનો પ્રયાસ કરતો હતો. જે દરમ્યાન પોલીસ કોન્સ્ટેબલ જગદીશ આહિરે સાઈડમાં ઊભા રહેવાનું કહેતા હોલેહોલે ઉશ્કેરાઈ ગયો હતો અને પોતાની પાસે રહેલી છરી કાઢી પો.કો. જગદીશ આહિર ઉપર ઘા કરતા જગદીશ આહિરે આડો હાથ રાખતા પો.કો.ને હાથ પર ઈજા થઈ હતી. પોલીસ સૂત્રોના જણાવ્યા મુજબ કોર્ટ સંકુલમાં સ્ટેનોગ્રાફર રૂમની સામે આ બનાવ બન્યો હતો. એ-ડિવિઝન પોલીસે આ બનાવમાં પો.કો. જગદીશ આહિરની ફરિયાદના આધારે આરોપ હોલેહોલે સામે આઈપીસી ૩૦૭, પ૦૪, ૧૮૬, ૩૩ર, ૩પ૩ અને બીપીએજી ૧૩પ મુજબ હત્યાની કોશીશ, કોર્ટમાં રૂકાવટ વિ. ગુના નોંધી આરોપીની ધરપકડ લેવા તજવીજ હાથ ધરી છે.