પાલનપુર, તા.૧૩
છેલ્લા ઘણા સમયથી વિવાદોના વમણમાં સપડાયેલા બનાસકાંઠા જિલ્લા કોંગ્રેસ પ્રમુખ જાકીર ચૌહાણને આખરે સાંજે મોવડીમંડળે જિલ્લા પ્રમુખમાંથી દૂર કરી કાર્યકારી પ્રમુખ તરીકે પૂર્વ કેન્દ્રીયમંત્રી બી.કે.ગઢવીના પુત્ર દિનેશ ગઢવીને પ્રમુખ બનાવતા કોંગ્રેસી વર્તુળમાં ચકચાર મચી જવા પામી છે. તાજેતરમાં જિલ્લા પંચાયત અને તાલુકા પંચાયતની ચૂંટણીની ટિકિટ વહેચણીમાં જિલ્લા પ્રમુખ જાકીર ચૌહાણે પૈસા લઈ ટિકિટ આપી હોવાના આક્ષેપોએ ભારે જોર પકડ્યું હતું. જેમાં આ બાબતના ઓડિયો પણ વોટ્સએપમાં ફરતા થયા હતા. આ બાબતે મોવડીમંડળે તપાસ માટે કોંગ્રેસી આગેવાનોની સમિતિ બનાવી તપાસ હાથ ધરેલ. દરમિયાન આજરોજ મોવડીમંડળ દ્વારા કોંગ્રેસ પ્રમુખ જાકીર ચૌહાણને દૂર કરવાનો નિર્ણય લેવાયો હતો અને કાર્યકારી પ્રમુખ તરીકે દિનેશ ગઢવી અને ઉપપ્રમુખ તરીકે યાસીન બંગલાવાલાની નિમણૂક કરાઈ હતી. જેને આજે સાંજે કોંગ્રેસી કાર્યકરોએ વધાવી લીધી હતી અને દિનેશ ગઢવીને ફૂલહાર કરી શુભેચ્છા પાઠવાઈ હતી. દરમિયાન બનાસકાંઠા ભાજપના મોટા નેતા અને જિલ્લા પંચાયતના પૂર્વ પ્રમુખ રાજેન્દ્ર જોષી આજે કોંગ્રેસમાં જોડાઈ જતાં બનાસકાંઠામાં કોંગ્રેસ વધુ મજબૂત બનશે તેમ નવનિયુક્ત પ્રમુખે જણાવ્યું હતું.
