(સંવાદદાતા દ્વારા) સુરત, તા.૩૧
સરથાણાના ખેડૂતને બેંક ઓફ બરોડા નામે ફોન કરી માર્ચ એન્ડિંગનું બહાનું બતાવી બેંક ખાતાની ડિટેઈલ લીધા બાદ ખાતામાંથી રૂ.૭૮,૭૯૫ની રકમ ઓનલાઈન ઉપાડી લઇ ભેજાબાજોએ ઠગાઇ કરી હતી. પોલીસ સૂત્રો પાસેથી પ્રાપ્ત માહિતી અનુસાર સરથાણા શ્યામગામ ચોક સ્થિત મહાવીર નગર ખાતે રહેતાં અને વ્યવસાય ખેડૂત ભૂપતભાઈ પોપટભાઈ બલરને ગત ૨૬મી માર્ચથી ૩૦મી માર્ચ દરમિયાન કોઈ ઠગે ભૂપતભાઈને ફોન કરી પોતાની ઓળખ છોટા ઉદેપુર જિલ્લાના સંખેડા તાલુકાના ઈન્દ્રાલ ગામે આવેલ બેંક ઓફ બરોડાની શાખાના કર્મચારી તકરીકે ઓળખ આપી તમારા ખાતામાં બેલેન્સ ઓછું છે. માર્ચ એન્ડીંગ હોવાથી બેલેન્સ કરાવો, ત્યારબાદ તમારૂ એટીએમ કાર્ડ બંધ થવાની તૈયારીમાં છે. એટીએમ કાર્ડ ન થતા આધાર કાર્ડ નંબર આપો તેમ કહ્યું હતું. જેથી ભૂપતભાઈ ડિટેઈલ આપતા ઠગ શખ્સે તેનો ફાયદો ઉઠાવી તેઓના બેંક ખાતામાંથી રૂ.૭૮,૭૯૫ ઓનલાઈન ટ્રાન્સફર કરી છેતરપિંડી કરી હતી. ખેડૂત ભૂપતભાઈએ આ અંગે સરથાણા પોલીસ ઈન્સ્પેક્ટર એન.ડી. ચૌધરીને જાણ કરી હતી. જેથી પીઆઈ ચૌધરીએ પાસબુકના આધારે છેતરપિંડીની ફરિયાદ નોધી આગળની તપાસ શરૂ કરી હોવાનું જાણવા મળે છે.
