(સંવાદદાતા દ્વારા), સુરત તા.૧૦
ઉત્તર ગુજરાતમાં પરપ્રાંતીય નાગરિકો પર થયેલ હુમલા પગલે શહેર પોલીસ દ્વારા આગોતર, આયોજન હાથ ધરવામાં આવ્યું છે. દરેક પોલીસ મથકમાં એક-એક ક્વિક રિસ્પોન્સ ટીમ આજથી તૈનાત કરવામાં આવી છે. પરપ્રાંતીયને ધમકી મળે તો તેની તાત્કાલિક મદદનું કામ આ ટીમ કરશે.
સુરત શહેર પોલીસ કમિશનર સતીષ શર્મા દ્વારા આજે બપોરે પત્રકાર પરિષદનું આયોજન કરવામાં આવ્યું હતું. સુરતમાં કોઈ પણ નાગરિકને કોઈ પરેશાની નથી તે ચાહે ઉત્તર ભારતીય હોય, દક્ષિણ ભારતીય હોય કે ગુજરાતી હોય આ માહોલને બનાવી રાખવા અને સુરક્ષા વ્યવસ્થાને વધુ મજબુત બનાવવા માટે શહેર પોલીસ દ્વારા આજે કેટલાક મહત્ત્વના પગલા લેવામાં આવ્યા છે. આજથી દરેક પોલીસ સ્ટેશન વિસ્તારમાં એક એક્સ્ટ્રા મોબાઈલ વેન કાર્યરત રહેશે. જેને ક્વિક રિસ્પોન્સ ટીમ કહેવામાં આવશે. જે માત્ર આ કામ કરશે કે કોઈ પરપ્રાંતીયને કોઈ ભય ધમકી મળે તો તાત્કાલિક મદદ કરવામાં આવશે. એક પીએસઆઈ, ચાર પોલીસ જવાન, હથિયાર અને ગેસની સાથે રહેશે. આ ટીમ બે સીફ્ટમાં ચોવીસ કલાક કામ કરશે. બીજા મહત્ત્વનો નિર્ણય એ લેવામાં આવ્યો છે કે સવારે ૮ થી રાત્રે ૧૨ વાગ્યા સુધી દરેક પોલીસ ઈન્સ્પેક્ટર પોલીસ મથકે અથવા પોલીસ મથક વિસ્તારમાં હાજર રહેશે. પોતાનો વિસ્તાર છોડવો હોય તો ડીસીપીની પરમીશન લેવી પડશે. દરેક એસીપી, ડીસીપીને પણ સૂચના અપાઈ છે કે તેઓ વધુમાં વધુ સમય પોતાના વિસ્તારમાં જ રહે જેથી કોઈ ઘટના બને તો અથવા કોઈને ધમકી મળે તો તાત્કાલિક પગલા લઈ શકાય અને તેનું નિરાકરણ લાવવામાં આવશે. પોલીસ કન્ટ્રોલ રૂમને સૂચના આપી છે કે કોઈપણ પરપ્રાંતીય ઉત્તર ભારતીય તરફથી કોઈ કોલ કે સૂચના મળે તો તાત્કાલિક ક્વિક રિસ્પોન્સ ટીમ, જે તે પોલીસ મથકના ઈન્સ્પેક્ટર, એસીપી, ડીસીપી સ્થળ પર પહોદ્વચી સમસ્યાનો નિરાકરણ લાવશે. ક્રાઈમ બ્રાંચ સોશિયલ મીડિયા પર નજર રાખી રહી છે. વાંધાજનક ટિપ્પણી કરનારાઓને બોલાવીને તેમને સૂચના આપવામાં આવી છે. તેમ છતાં જા તેઓ સોશિયલ મીડિયા પર ભડકાઈ પોસ્ટ મુકશે અને અફવા ફેલાવશે તો તેમના ઉપર કાયદેસર કાર્યવાહી હાથ ધરવામાં આવનાર હોવાનું જાણવા મળે છે.
