અમદાવાદ, તા.૨૯
રાજકોટ શહેરમાં ઢેબર રોડ પર જૂના બસ સ્ટેન્ડ પાસે ધોળા દિવસે રમેશ કાંતિલાલ આંગડિયા પેઢીના કર્મચારી પંકજ રામાભાઇ પટેલને બાઇક પર આવેલા બે શખ્સોએ પોતે પોલીસ છે તેમ કહી રોક્યો હતો. બાદમાં તારા થેલામાં ચપ્પુ અને ગેરકાયદેસર ચીજવસ્તુઓ છે, ચેક કરવો પડશે તેમ કહી લાફો મારી ચેકીંગ કર્યું હતું. રેઇનકોટ પહેરી બાઇક પર આવેલા બંને શખ્સો રૂ.૧૭ લાખ ભરેલો થેલો લઇ ફરાર થઇ ગયા હતા. આ બનાવને પગલે સમગ્ર વિસ્તારમાં ભારે ચકચાર મચી ગઇ હતી. સમગ્ર બનાવ અંગે સ્થાનિક પોલીસે સીસીટીવી ફુટેજના આધારે મામલાની તપાસ શરૂ કરી છે અને નકલી પોલીસ બનીને આવેલા બંને આરોપીઓને ઝડપી પાડવાના ચક્રો ગતિમાન કર્યા છે. ઉત્તર ગુજરાતથી આજે રાજકોટ આવેલો કર્મચારી પંકજ ઢેબર રોડ પર જૂના બસ સ્ટેશન પાસે બસમાંથી ઉતરીને સોની બજાર તરફ ચાલીને જતો હતો. ત્યારે બાઇક પર બે શખ્સ આવ્યા હતાં અને તેણે આંગડિયા કર્મચારીને તારા થેલામાં ચપ્પુ અને બીજી ગેરકાયદેસર ચીજવસ્તુઓ છે તેમ કહી પોતે પોલીસ હોવાની ઓળખ આપી હતી અને આઇકાર્ડ પણ બતાવ્યું હતું. એ પછી થેલો ચેક કરવાનું નાટક કર્યું હતું. આંગડિયા કર્મચારીએ જો તમે પોલીસ હોવ તો મને પોલીસ સ્ટેશને લઇ જઇને ચેક કરો તેમ કહેતાં તેને લાફો મારી દીધો હતો અને તેનો થેલો આંચકી તેમાંથી રૂ.૧૭ લાખની રોકડના બંડલો લૂંટારાઓએ પોતાની પાસેના થેલામાં લઇ લીધા હતા અને આંગડિયા કર્મચારીને તું રિક્ષામાં બેસ, પોલીસ સ્ટેશને લઇ જવો પડશે તેમ કહી રિક્ષામાં બેસાડ્‌યો હતો અને બંને ભાગી ગયા હતાં. મામલો એ-ડિવીઝન પોલીસ સુધી પહોંચતા પોલીસ ટીમ તથા ક્રાઇમ બ્રાંચનો કાફલો ઘટનાસ્થળે પહોંચ્યો હતો. સીસીટીવી કેમેરા ચેક કરવા સહિત નાકાબંધીની કાર્યવાહી કરવામાં આવી રહી છે. કર્મચારીનું નામ પંકજ રામાભાઇ પટેલ (રહે. મુળ મહેસાણા હાલ રાજકોટ કોઠારીયા નાકા જ્વેલર્સ પોઇન્ટ) રમેશ કાંતિલાલ આંગડિયા પેઢીનો કર્મચારી હોવાનું જાણવા મળ્યું છે.
પંકજ અને અન્ય કર્મચારી વિપુલ ગોંડલ ઉઘરાણીએ ગયા હતાં. ત્યાંથી પૈસા લઇ રાજકોટ પહોંચ્યા હતાં અને ઢેબર રોડ પર લૂંટની ઘટના બની હતી. બંને રિક્ષામાં બેઠા એ પછી સામે ઉભેલા એક શખ્સે પોલીસ તરીકે ઓળખ આપી થેલા ચેક કરવાની વાત કરી હતી અને લૂંટને અંજામ આપ્યો હતો.