(સંવાદદાતા દ્વારા) સુરત, તા.૨૬
કેન્દ્ર શાસિત પ્રદેશ દમણમાં મોડી રાત્રે એક કારનો ગોઝારો અકસ્માત સર્જાયો હતો. દમણના પતલિયા ખાતે કાર ચાલકે સ્ટીયરીંગ પરથી કાબુ ગુમાવતા ડિવાઈડર સાથે અથડાતાં કારમાં સવાર ચાર યુવકોના મોત નિપજ્યા હતા. ઘટનાની જાણ થતા પોલીસે ઘટના સ્થળે પહોંચી વધુ તપાસ હાથ ધરી હતી.
દમણના પતલિયા ખાતે વલસાડ જિલ્લાના યુવકો આઈ-૨૦ કાર(જી.જે.-૧૫-એ.ડી.-૬૬૩૬)માં પસાર થઈ રહ્યા હતા. ફુલ સ્પીડમાં જતા કારના ચાલકે સ્ટીયરીંગ પરથી કાબુ ગુમાવતા કાર ડિવાઈડર સાથે અથડાઈ હતી. આ ગોઝારા અકસ્માતમાં કારમાં સવાર ચાર યુવકોના ઘટના સ્થળે જ મોત નિપજ્યા હતા. ઘટનાની જાણ થતા પોલીસ દોડી આવી હતી અને પંચનામુ કરી મૃતદેહોને પોસ્ટમોર્ટમ અર્થે ખસેડ્યા હતા અને વધુ તપાસ હાથ ધરી હતી. કારના આગળનો ભાગનો ખુરદો બોલી ગયો હતો. કાર અને રોડ લોહીથી ખરડાઈ ગયો હતો. કારને થયેલા નુકસાન પરથી કારની સ્પીડ પણ વધુ હોવાની શક્યતાઓ સેવાઈ રહી છે. જ્યારે સ્થાનિકોના જણાવ્યા પ્રમાણે કારના ડ્રાઈવરને ભારે જહેમતે બહાર કાઢવામાં આવ્યો હતો. કૃણાલ રમણભાઈ પટેલ, જીજ્ઞેશ હસમુખભાઈ પટેલ અન્ય બે યુવાનોના નામ જાણી શકાયા નથી. પોલીસે અકસ્માત મોતનો ગુનો નોંધી વધુ તપાસ હાથ ધરી હોવાનું જાણવા મળે છે.