(એજન્સી)
નવી દિલ્હી, તા. ૩
ભારતીય હવામાન વિભાગ (આઇએમડી)એ ચોમાસાના આગામી બે મહિનામાં વરસાદમાં બે ટકા ઘટાડાની આગાહી કરી છે. હવામાન વિભાગે જણાવ્યું કે ઓગસ્ટ અને સપ્ટેમ્બરમાં ૯૫ ટકા વરસાદ પડશે. ચોમાસાના પ્રથમ બે મહિનામાં બિહાર, ઝારખંડ અને ઉત્તરપૂર્વના રાજ્યો સિવાય દેશના મોટાભાગમાં સારો વરસાદ પડ્યો છે અને આ ટ્રેન્ડ ચાલુ રહેશે. જુન અને જુલાઇમાં સારો વરસાદ પડ્યો હોવાથી કૃષિ મોરચે ભયનું કોઇ કારણ હોવાનું હવામાન વિભાગે નકારી કાઢ્યું છે.
હવામાન વિભાગે શુક્રવારે જણાવ્યું કે ૧૯૫૧થી ૨૦૦૦ દરમિયાન ખરેખર પડેલા વરસાદને આધારે ભારતનો લાંબાગાળાનો સરેરાશ વરસાદ ૮૯ સેમી છે. ૩૧મી જુલાઇ સુધીની વરસાદની માહિતી ધ્યાનમાં લઇને આ ગણતરી કરવામાં આવી છે. અગાઉ, એપ્રિલ અને મે મહિનામાં બે વાર હવામાન વિભાગ દ્વારા વરસાદ અંગે આગાહી કરવામાં આવી હતી. અનુકૂળ વાતાવરણ માપદંડોને આધારે દેશમાં ૯૭ ટકા વરસાદ પડવાની આગાહી કરાઇ હતી. હવે હવામાન વિભાગે તેના અગાઉના અંદાજમાં બે ટકાનો ઘટાડો કર્યો છે અને દેશમાં ૯૫ ટકા વરસાદ પડવાની આગાહી કરી છે. હવામાન વિભાગની સંભવિત ગણતરી સૂચવે છે કે ચોમાસુ સામાન્યથી નીચે રહેવાની ૪૭ ટકા અને સમાન્ય રહેવાની ૪૧ ટકા શક્યતા છે જ્યારે સામાન્ય કરતા વધુ વરસાદ પડવાની કોઇ શક્યતા નથી તેમ છતાં આવી સ્થિતિ સર્જાવાની ૧૨ ટકા શક્યતા છે.
