‘લોકશાહી બચાવો’ રેલીમાં ભાજપ સાંસદ રાજકુમાર સૈનીએ બાર ડાન્સર પાસે અશ્લીલ નૃત્યો કરાવ્યા

(એજન્સી) નવી દિલ્હી, તા.૯
‘લોકશાહી બચાવો’ રેલીમાં ભાજપના નેતાઓ દ્વારા શરમજનક હરકતનો મામલો પ્રકાશમાં આવ્યો છે. ભાજપના સાંસદે ટોળા એકત્રિત કરવા કેવળ બાર બાળાઓને જ બોલાવી નહીં પરંતુ એમની પાસે અશ્લીલ નૃત્યો પણ કરાવ્યા. અહેવાલ મુજબ ભાજપ સાંસદ રાજકુમાર સૈનીએ બલ્લભગઢ તિગાંમમાં એક ‘લોકશાહી બચાવો’ રેલીનું આયોજન કર્યું હતું. આ રેલીમાં ભીડને આકર્ષવા તેમણે બાર બાળાઓને બોલાવી. તેઓ આટલેથી ન અટકતા બાર બાળાઓ પાસે મંચ ઉપર અશ્લીલ ઠુમકાઓ પણ લગાવ્યા. એકત્રિત ભીડને રોકી રાખવા માટે પણ કાર્યક્રમ રાખવામાં આવ્યો હતો. આ દરમિયાન બાર ડાન્સર પાસે મહિલાઓની સામે અશ્લીલ ગીતો પર નૃત્ય કરાવવામાં આવ્યું હતું. ભાજપ સાંસદ દ્વારા લોકશાહી બચાવો કાર્યક્રમ દરમિયાન આ પ્રકારની રેલીની ચોમેર ટીકાઓ થઈ રહી છે.