(સંવાદદાતા દ્વારા) આણંદ, તા.૮
વલ્લભવિદ્યાનગરના બાકરોલ સ્કેવરમાં આવેલી ઈસ્કોન એજ્યુકેશનલ કન્સલન્ટન્ટમાંથી પકડાયેલા બનાવટી માર્કશીટ કૌભાંડના બન્ને મુખ્ય સૂત્રધારોને વિદ્યાનગર પોલીસે ઝડપી પાડીને છાપકામના સાધનો કબજે કરીને કરી તપાસ હાથ ધરી છે,જેમાં નવસારી જલાલપોર યુથ ભાજપનો ઉપપ્રમુખ પણ ઝડપાતા ચકચાર મચી જવા પામી છે.
મળતી વિગતો અનુસાર વલ્લભ વિદ્યાનગર પોલીસે શનિવારના રોજ ઈસ્કોન એજ્યુકેશનલ કન્સલન્ટન્ટમાં છાપો મારીને બનાવટી માર્કશીટોના આધારે વિદેશ મોકલવાનું રેકેટ ઝડપી પાડ્‌યું હતુ. પોલીસે કેટલીક બનાવટી માર્કશીટો તેમજ શૈક્ષણિક દસ્તાવેજો પણ જપ્ત કર્યા હતા અને ધવલકુમાર મહેન્દ્રભાઈ પટેલ, અમરીશ જયેશભાઈ પટેલ, મૌલિક નીલેશભાઈ ઉર્ફે ભીખાભાઈ પટેલ અને હિતેશ રમેશભાઈ પટેલની ધરપકડ કરી હતી. ચારેયના ત્રણ દિવસના રીમાન્ડ મેળવીને પૂછપરછ ગુજરાત રાજ્યની શૈક્ષણિક સંસ્થાની બનાવટી માર્કશીટો વડદોરા ખાતે રહેતો હિરેન ઉર્ફે સોનુ અને ગુજરાત રાજ્ય બહારની માર્કશીટો નવસારીનો હિરેન મૈસુરીયા બનાવી આપતા હોવાનું ખુલતા જ વિદ્યાનગર પોલીસની બે અલગ-અલગ ટીમોએ વડોદરા અને નવસારીમાં છાપાઓ મારીને બન્ને શખ્સોને ઝડપી પાડ્‌યા હતા.નવસારીનો હિરેન મૈસુરીયા જલાલપોર યુથ ભાજપનો ઉપપ્રમુખ હોવાનું ખુલતા ચકચાર મચી જવા પામી છે, વલ્લભવિદ્યાનગર પોલીસે ઝડપી પાડેલો જલાલપોર યુથ ભાજપનો ઉપપ્રમુખ હિરેન મૈસુરીયા મહારાષ્ટ્ર શિક્ષણ બોર્ડ તેમજ યુનીવર્સીટીની માર્કસીટો બનાવી આપતો હતો,જેની પાસેથી પોલીસે કેટલીક બનાવટી માર્કસીટો પણ કબ્જે કરી હોવાનું જાણવા મળેલ છે,ભાજપનો હોદ્દેદાર બનાવટી માર્કસીટ કૌભાંડમાં ઝડપાતા ચકચાર મચી જવા પામી છે,અને સ્થાનીક ભાજપમાં સન્નાટો જોવા મળી રહ્યો છે, પોલીસે હિરેન ઉર્ફે સોનુ પાસેથી બનાવટી માર્કશીટ છાપકામ કરવાની સામગ્રી પણ કબ્જે કરી છે.