(સંવાદદાતા દ્વારા) અમદાવાદ, તા.૧૭
બિનસચિવાલય ક્લાર્કની પરીક્ષામાં ગેરરીતિ અને કૌભાંડ બહાર આવ્યા બાદ રાજ્ય સરકારે ભરતી પરીક્ષા રદ્દ કરવાનો નિર્ણય લીધા બાદ હવે શિક્ષણ વિભાગ પણ હરકતમાં આવ્યું છે. આગામી વર્ષમાં લેવાનારી ધો.૧૦ અને ધો.૧રની પરીક્ષામાં પણ ગેરરીતિ રોકવા સીસીટીવી કેમેરાની ચકાસણી, પેપર ચકાસણી, પેપર લાવવાની લઈ જવા સુધીની તમામ પ્રક્રિયા ફૂલપ્રૂફ બનાવવા ઉપરાંત તકેદારીના તમામ પગલાં લેવાની સૂચના આપવામાં આવી છે. ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા દર વર્ષે માર્ચ મહિનામાં લેવાતી ધોરણ-૧૦ અને ધોરણ-૧૨ની પરીક્ષામાં લાખો વિદ્યાર્થીઓનું ભાવિ નક્કી થાય છે. ત્યારે આ પરીક્ષામાં કોઈ પણ પ્રકારની ગેરરીતિ ન થાય તે માટે શિક્ષણ વિભાગ દ્વારા ખાસ આદેશ કર્મચારીઓને કરવામાં આવ્યા છે. વિદ્યાર્થીઓ શાંતિપૂર્ણ રીતે પરીક્ષા આપે તે માટે ખાસ તકેદારી રાખવાના આદેશ અપાયા છે. બિનસચલિવાલય પરીક્ષા રદ થયા બાદ આખરે તંત્ર જાગ્યુ છે અને બોર્ડની પરીક્ષાને લઈને મહત્વના નિર્ણયો કરવામાં આવ્યા છે. શિક્ષણ મંત્રી ભૂપેન્દ્રસિંહ ચુડાસમાએ શિક્ષણ તંત્રને આ મામલે તાકીદ કરી છે અને બિનસચિવાલય ભરતી પરીક્ષા જેવી પરિસ્થિતિનું નિર્માણ બોર્ડની પરીક્ષામાં ન થાય તે ધ્યાન રાખવાની સલાહ અપાઈ છે. સાથે જ સીસીટીવીનો વ્યાપ વધે અને કોઈ વિદ્યાર્થી મોબાઈલ લઈને કે અન્ય કોઈ સાહિત્ય લઈને વર્ગખંડમાં ન આવે તેનું ખાસ ધ્યાન રાખવાની સૂચના અપાઈ છે. પેપરસેટ કરવાથી લઈને પેપર ચકાસણી સુધી વ્યવસ્થા ફૂલપ્રૂફ કરાશે. ઉપરાંત પરીક્ષામાં જડબેસલાક વ્યવસ્થા ગોઠવવામાં આવશે. સીસીટીવી કેમેરા, પેપર ચકાસણી, પેપર લાવવા લઈ જવાની વ્યવસ્થા વગેરેમાં યોગ્ય વ્યવસ્થા કરવા સૂચના આપવામાં આવી છે.