(એજન્સી) બેંગ્લુરૂ, તા.૧૦
કર્ણાટકમાં જેડીએસ અને કોંગ્રેસ ગઠબંધનની સરકારના સંબંધો સતત બગડી રહ્યાં છે. ગઠબંધન સરકારની કમાન સંભાળી રહેલા મુખ્યમંત્રી એચડી કુમારસ્વામીએ સ્પષ્ટ સંકેત આપ્યો છે કે કર્ણાટકની સરકાર આગામી લોકસભા ચૂંટણી બાદ વધારે દિવસો સુધી ટકશે નહીં.
જેડીએસના ધારાસભ્યો અને એમએલસીની બેઠકને સંબોધિત કરતા કર્ણાટકના મુખ્યમંત્રી કુમારસ્વામીએ ભાવુક મુદ્રામાં જણાવ્યું હતું કે, દરેક બાબતમાં કોંગ્રેસ સતત દખલગીરી કરી રહી છે, જેના કારણે મુખ્યમંત્રી જેમ નહીં પરંતુ કલાર્કની જેમ કામ કરી રહ્યો છું.
જેડીએસના કેટલાક ધારાસભ્યોના કહેવા અનુસાર કુમારસ્વામીએ ગઠબંધન સરકાર બનાવ્યા પછી પોતાની સામેના પડકારો અંગે વાતચીત કરી હતી.
અત્રે ઉલ્લેખનીય છે કે, મે-૨૦૧૮માં ભાજપને સત્તાથી દૂર રાખવા માટે જેડીએસ એ કોંગ્રેસ સાથે હાથ મિલાવ્યો હતો.
મુખ્યમંત્રી કુમારસ્વામીએ જણાવ્યું કે, કોંગ્રેસના નેતાએ એ તમામ કામ કરાવવા મજબૂર કરી રહ્યાં છે, જે એમના પક્ષમાં છે અને એમનું માનવા સિવાય મારી પાસે કોઈ વિકલ્પ નથી. હું ખૂબ દબાણમાં કામ કરી રહ્યો છું અને કોંગ્રેસના નેતા કાયમ આશા રાખે છે કે હું એમનું કહ્યું માનું. આમ, કુમારસ્વામીના ભાવૂક સૂરના રાજકીય પંડિતો અલગ-અલગ અર્થ કાઢી રહ્યાં છે.