(એજન્સી) બેઇજિંગ, તા.૧૧
ચીનમાં કોરોના વાયરસ વિકરાળ સ્વરૂપ ધારણ કરી રહ્યો છે, જેના કારણે દુનિયાભરના દેશો ચિંતામાં મૂકાઈ ગયા છે. ચીનમાં કોરોના વાયરસના કારણે મોતને ભેટેલા લોકોનો આંક ૧૦૦૦ને પાર પહોંચી ચૂક્યો છે. ચીનમાં અત્યાર સુધીમાં ૧૦૧૧ લોકો આ વાયરસની લપેટમાં આવીને મોતને ભેટી ચૂકયા છે. મૃતકોની સંખ્યામાં જો ફિલીપીંસ અને હોંગકોંગમાં થયેલા એક-એક વ્યક્તિના મોતનો સમાવેશ પણ કરવામાં આવે તો આ આંકડો ૧૦૧૩ સુધી પહોંચે છે.
ચીનની સરકારી મીડિયાના રિપોટ્‌ર્સ અનુસાર આ વાયરસની લપેટમાં આવેલા લોકોની સંખ્યા ૪૨૩૦૦ પર પહોંચી ગઈ છે. ૨૦૦૩માં ફેલાયેલા સીવિયર અક્યૂટ રેસ્પિરેટરી સિન્ડ્રોમ (SARS)ના કારણે ૭૭૪ લોકોનાં મોત નિપજ્યા હતા. જેની સરખામણીમાં કોરોના વાયરસના કારણે મોતને ભેટેલા લોકોની સંખ્યા ઘણી વધારે છે. ચીનના સ્વાસ્થ્ય અધિકારીઓએ સોમવારે જણાવ્યું હતું કે, ચીનમાં કોરોના વાયરસથી મૃતકોની સંખ્યા વધીને ૯૦૮ થઈ ગઈ છે, જેમાં સૌથી વધુ મોત હુબેઈ પ્રાંતમાં થયા છે. ઉપરાંત કોરાના વાયરસથી કુલ ૪૨૩૦૦ અસરગ્રસ્ત હોવાની પુષ્ટિ થઈ છે. બીજી તરફ, આ બાબતને ગંભીરતાથી લઈને વર્લ્ડ હેલ્થ ઓર્ગેનાઈઝેશને કોરોના વાયરસને કાબૂમાં લેવા માટે પોતાની એક ટીમ ચીન મોકલી છે.
ચીનના વિદેશ મંત્રાલયના જણાવ્યા અનુસાર, દેશમાં ૨૭ વિદેશી નાગરિકોને કોરોના વાયરસથી અસર થઈ છે. એમાં બે લોકોનાં મોત થયા છે. આ આંકડો ૧૦મી ફેબ્રુઆરી સુધીનો છે. ચીનના વિદેશ મંત્રાલયના અધિકારીએ એમ પણ કહ્યું કે, દેશ તમામ વિદેશી નાગરિકોના સ્વાસ્થ્ય અને સુરક્ષાને ખૂબ મહત્વ આપે છે. કોરોનાને પગલે જે બે વિદેશી નાગરિકોનાં મોત થયા છે, તેમાં ૬૦ વર્ષીય એક અમેરિકી મહિલા અને એક જાપાનનો પુરૂષ સામેલ છે, આ બંનેના વુહાન શહેરમાં કોરોના વાયરસની અસરથી મોત થયા છે. જ્યારે ૨૭ અસરગ્રસ્ત વિદેશી નાગરિકો પૈકી ત્રણને હોસ્પિટલમાંથી રજા આપવામાં આવી છે. અત્રે ઉલ્લેખનીય છે કે, ચીનથી કોરોના વાયરસ હમણાં સુધી ૨૬ દેશોમાં ફેલાઈ ગયો છે.

ડબલ્યુએચઓની ટીમ ચીન પહોંચી

વિશ્વ આરોગ્ય સંસ્થાના તબીબી નિષ્ણાતોની એક ટીમ સોમવારે રાત્રે નોવેલ કોરોના વાઈરસ સંક્રમણની તપાસમાં મદદ માટે ચીન પહોંચી ગઈ છે. ટીમનું નેતૃત્વ ડો.બ્રુસ અલવાર્ડ કરી રહ્યા છે. ચીનના નેશનલ હેલ્થ કમિશનના અધિકારી મી ફેંગે કહ્યું હતું કે અમે આંતરરાષ્ટ્રીય નિષ્ણાતોની ટીમનું સ્વાગત કરી છીએ. ચીન અને ડબલ્યુએચઓની ટીમ કોરોના વાયરસના ઈલાજને લઈ વ્યાપક ચર્ચા કરશે અને આ મહામારીના ફેલાવાને અટકાવવા માટે યોગ્ય પગલા ભરશે.