સિડની, તા.૧૧
ઓસ્ટ્રેલિયાના આક્રમક બેટ્‌સમેન ડેવિડ વોર્નરે કહ્યું કે, તે ટેસ્ટ અને વનડે કરિયરને આગળ વધારવા અને પોતાના પરિવારની સાથે વધુ સમય પસાર કરવા માટે આગામી કેટલાક વર્ષોમાં ટી-૨૦ ક્રિકેટને અલવિદા કહી શકે છે. ક્રિકેટ ઓસ્ટ્રેલિયાના વર્ષના સર્વશ્રેષ્ઠ ક્રિકેટરનો એલન બોર્ડર મેડલ જીતનાર વોર્નરે પુરસ્કાર મેળવ્યા બાદ ભાવુક થયો હતો. ૨૦૧૮માં બોલ ટેમ્પરિંગને કારણે એક વર્ષ પ્રતિબંધનો સામનો કર્યા બાદ શાનદાર વાપસી કરતા વોર્નરે આ પુરસ્કાર જીત્યો છે. ડેવિડ વોર્નરને વર્ષનો સર્વશ્રેષ્ઠ ટી૨૦ ક્રિકેટર પણ પસંદ કરવામાં આવ્યો હતો. વોર્નરે એએપીને કહ્યું, ’ટી-૨૦ ક્રિકેટમાં સતત વિશ્વકપ રમવાનો છે. આ ફોર્મેટમાં હું આગામી કેટલાક વર્ષોમાં નિવૃતી લઈ શકુ છું. ત્રણેય ફોર્મેટમાં રમવું મુશ્કેલ છે. તે બધાને શુભકામનાઓ જે આમ કરી શકે છે. આ પડકારજનક છે.’ટેસ્ટ અને વનડે બંનેમાં વોર્નરની એવરેજ ૪૦થી ઉપરની છે અને ટી-૨૦માં તેની સ્ટ્રાઇક રેટ ૧૪૦ની છે. આગમી બે ટી૨૦ વિશ્વકપ ઓસ્ટ્રેલિયા (આ વર્ષે) અને ભારત (આગામી વર્ષે) યોજાવાના છે. વોર્નરે કહ્યું કે, તેણે ભારતના પૂર્વ ઓપનિંગ બેટ્‌સમેન વીરેન્દ્ર સહેવાગ સાથએ વાત કરી છે જેથી ત્રણેય ફોર્મેટમાં રમવાથી થાકને સમજી શકાય.