(એજન્સી) વોશિંગ્ટન, તા.૩
રાષ્ટ્રપતિ ડોનાલ્ડ ટ્રમ્પે તેમના નિકટના સહયોગી સઉદી અરબ વિશે બિન મુત્સદ્દીગીરી ભરી ટિપ્પણી કરી હતી અને એવી ચીમકી ઉચ્ચારી કે અમેરિકાના સમર્થન વિના સઉદી અરેબિયાના કિંગ સલમાન ‘બે સપ્તાહ’ પણ સત્તા પર ટકી શકશે નહીં. ટ્રમ્પે કહ્યું કે સઉદી શાસન અમેરિકાની મદદને કારણે સુરક્ષિત છે. અહેવાલ મુજબ રાષ્ટ્રપતિ ડોનાલ્ડ ટ્રમ્પે કહ્યું કે, અમે સઉદી અરબની સુરક્ષા કરીએ છીએ, તમે કહો છો કે તે અમીર છે ? અને હું કિંગ સલમાનને પ્રેમ કરૂં છું. તેમણે કિંગ સલમાન સાથે ટેલિફોન પરની વાતચીત અંગે જણાવ્યું કે, તેમણે કિંગ સલમાનને કહ્યું કે, કિંગ અમે તમારી રક્ષા કરીએ છીએ. અમારા સમર્થન વિના બે અઠવાડિયા પણ તમારી સત્તા ટકશે નહીં. તમારે તમારા જ સૈન્યબળને ચુકવણી કરવી પડશે. ટ્રમ્પે કહ્યું કે, અમેરિકાએ કંઈપણ મેળવ્યા વિના આ દેશોના બચાવ માટે ઘણું કર્યું છે. એના બદલે સઉદી અમેરિકાને ઊંચા દરે તેલ આપીને લાભ ઊઠાવી રહ્યું છે; જે યોગ્ય નથી. તમે ટ્રિલિયન ડોલર કમાણી કરો છો. પરંતુ અમને જે વળતર મળવું જોઈએ એ મળતું નથી. ટ્રમ્પે કહ્યું કે, સઉદી અરબ તેલની કિંમત પરનો વધારો રોકીને અમેરિકાને નીચા દરે તેલ વેચવાનું શરૂ કરવું જોઈએ. સઉદી વિશે કઠોર શબ્દો વાપર્યા છતાં ટ્રમ્પ શાસન સઉદી અરબ સાથે ઘનિષ્ઠ સંબંધો બનાવી રહ્યું છે. જેને અમેરિકા ઈરાન મહત્ત્વાકાંક્ષા વિરૂદ્ધના ક્ષેત્રના રૂપે જુએ છે.