ઈવીએમ સાથે ચેડાંની મદદથી ભાજપ જીત્યું : હાર્દિક પટેલ

અમદાવાદ,તા.૧૮
પાટીદાર નેતા હાર્દિક પટેલે ગુજરાત વિધાનસભા ચૂંટણીમાં ભાજપની જીત પર નિશાનો સાધતા તેણે ઈવીએમની જીત બતાવી છે. હાર્દિકે કહ્યું કે જયારે એટીએમ હેક થઈ શકે છે તો ઈવીએમ કેમ હેક ન થઈ શકે ? તેઓએ આરોપ લગાવ્યો કે, ભાજપે રૂપિયા જોરે આ જીત હાંસલ કરી છે. હાર્દિકે પત્રકાર પરિષદમાં કહ્યું કે ૧ર-૧પ બેઠકો પર હાર-જીતનો અંતર ર૦૦-૧૦૦૦ મતો વચ્ચે રહ્યો છે. જે ઈવીએમની અંદર ફરીથી ગણતરી થઈ છે. ત્યાં જ બદલાવ આવ્યો છે. ઈવીએમ ટેમ્પરિંગ એક મોટો મુદ્દો છે. હાર્દિકે ભાજપા અધ્યક્ષ અમિત શાહ પર આડકતરી રીતે નિશાનો સાધતા કહ્યું કે, આ કોઈ ચાણકયની જીત નથી. હાર્દિકે ભાજપને જીત પર અભિનંદન પણ પાઠવ્યા છે. હાર્દિકે કહ્યું કે, મજબૂત પટેલ વસ્તી ધરાવતા વિસ્તારોમાં ભાજપની જીત પર ઈવીએમની છેડછાડ ન થાય એવું બની ન શકે, આ વિસ્તારોમાં ભાજપની જીત ઘણા સવાલો ઉભા કરે છે.