કાળઝાળ ગરમીમાં ઠંડક તો જોઈએને !

રાજ્યમાં હાલ અત્ર-તત્ર-સર્વત્ર ભીષણ ગરમીનો માહોલ છે. માનવ તો ગરમીથી બચવા ઘટમાં પુરાઈ કુલર અને એસીનો સહારો લઈ ગરમીથી રક્ષણ મેળવી લે છે. જ્યારે અબોલ પશુ-પક્ષી ગરમીથી બચવા શું કરે ? પ્રસ્તુત તસવીરમાં એક બિલાડીએ ગરમીથી બચવા પાણીની પાઈપમાં આશ્રય લીધું છે. ત્યારે બહાર મોઢું કાઢી તાપમાનનો ક્યાસ કાઢતી હોય તેમ બિલાડી હમણાં બહાર નીકળાય એવું છે કે નહીં ? તેમ વિચારતી હોય તેવું જણાઈ રહ્યું છે.

અમદાવાદ, તા.૧૦
અમદાવાદ, ડીસા, ગાંધીનગર સહિતના અનેક વિસ્તારોમાં ગરમીના પ્રમાણમાં આંશિક રીતે ઘટાડો થયો છે. આંશિક વાદળછાયુ વાતાવરણ રહેવાના કારણે લોકોને કાળઝાળ ગરમીથી આંશિક રાહત મળી છે. જો કે, બપોરના ગાળામાં લોકો ગરમીથી પરેશાન રહ્યા હતા. મોટાભાગના વિસ્તારોમાં મહત્તમ તાપમાનમાં આંશિક ઘટાડો થયો છે. અમદાવાદમાં પારો ગગડીને ૪૩.૩, ડિસામાં ૪૨.૬, ગાંધીનગરમાં ૪૩.૨ થયો હતો. જો કે, સુરેન્દ્રનગરમાં હજુ પણ મહત્તમ તાપમાન ૪૫ ડિગ્રી અકબંધ રહ્યો છે. હવામાન વિભાગના કહેવા મુજબ હિટવેવની સ્થિતિ સૌરાષ્ટ્રના જુદા-જુદા વિસ્તારો ખાસ કરીને સુરેન્દ્રનગરમાં પ્રવર્તી રહી છે. બીજી બાજુ ડિપડિપ્રેશનની સ્થિતિના પરિણામ સ્વરૂપે સૌરાષ્ટ્ર કચ્છના જુદા-જુદા ભાગોમાં તથા દક્ષિણ ગુજરાતના કેટલાક ભાગોમાં ગાજવીજ સાથે વરસાદ થઇ શકે છે જેમાં ભાવનગર, અમરેલી, ગીરસોમનાથ, જૂનાગઢ, પોરબંદર, દ્વારકા, મોરબી, રાજકોટ, બોટાદનો સમાવેશ થાય છે. તમામની નજર હાલમાં વાવાઝોડા ઉપર કેન્દ્રિત થઇ ગઇ છે અને તેના સંભવિત નુકસાનને ટાળવા વિવિધ પગલાં લેવાઈ રહ્યા છે. અમદાવાદમાં આવતીકાલે પણ પારો ૪૩થી ઉપર રહી શકે છે. કોર્પોરેશન તરફથી કહેવામાં આવ્યું છે કે, હાલમાં વાયરલ ઈન્ફેકશન અને ગરમીથી બચવા માટે લોકોએ કામ વગર બપોરના ગાળામાં ઘરથી બહાર નીકળવું જોઈએ નહીં. સાથે-સાથે સાથે વધુ પ્રમાણમાં પાણી, છાશ અને પ્રવાહીનું સેવન કરવું જોઈએ. હળવા રંગના સુતરાઉ કપડા પહેરવા અને તડકામાં ફરવાનું ટાળવું જોઈએ. બિનજરૂરીરીતે કામ વગર બહાર ન નિકળવા માટે પણ કહેવામાં આવ્યું છે. બાળકો અને મોટી વયના લોકોને વિશેષ સાવચેતી રાખવા માટે કહેવામાં આવ્યું છે. સૌરાષ્ટ્ર અને ખાસ કરીને રાજકોટ, અમરેલી અને સુરેન્દ્રનગરમાં જોરદાર ગરમીનો અનુભવ લોકો કરી રહ્યા છે. આના કારણે નવજાત શિશુ અને મોટી વયના લોકોને અસર થઇ શકે છે. ગરમીને લીધી લૂ લાગવાના અને બેભાન થઇ જવાના બનાવોમાં ઉલ્લેખનીયરીતે વધારો થઇ રહ્યો છે.

ક્યાં કેટલું તાપમાન
સ્થળ મહત્તમ તાપમાન
સુરેન્દ્રનગર ૪૫.૦
રાજકોટ ૪૩.૫
અમદાવાદ ૪૩.૩
ગાંધીનગર ૪૩.૨
અમરેલી ૪૨.૮
ડિસા ૪૨.૬
વી.વી.નગર ૪૧.૫
વડોદરા ૪૦.૮
કંડલા એરપોર્ટ ૪૦.૩
ભાવનગર ૪૦.૧