અમદાવાદ, તા.૩૧
લોકસભાની ચૂંટણી નજીક આવી રહી છે ત્યારે રાજ્ય સરકારે સરકારી કર્મચારીઓને ખુશ કરવા મોંઘવારી ભથ્થામાં વધારાની જાહેરાત કરી છે. રાજ્યના ડેપ્યુટી મુખ્યમંત્રી નીતિન પટેલે જાહેરાત કરી હતી કે ગુજરાત સરકારના કર્મચારીઓના મોંઘવારી ભથ્થામાં બે ટકાનો વધારો કરવામાં આવ્યો છે. જેનો અમલ ૧ ફેબ્રુઆરીથી કરાશે. આ ઉપરાંત ૧ જુલાઈ ર૦૧૮થી એરિયર્સ પણ આપવામાં આવશે જે એક સાથે રોકડમાં મળશે.
રાજ્ય સરકારે સરકારી કર્મચારીઓને મોટી ભેટ આપી છે. ગુજરાતના ડેપ્યુટી સીએમ નિતીન પટેલે જાહેરાત કરી છે કે મોંઘવારી ભથ્થામાં વધારો આપવામાં આવશે. જેમાં સરકાર દ્વારા સરકારી કર્મચારીઓને ૨ ટકા મોંઘવારી ભથ્થુ વધારવામાં આવશે. જેનાથી લાખો કર્મચારીઓને તેમજ નિવૃત્ત થયેલ પેન્શનરોને પણ લાભ થશે.
સરકારી કર્મચારીઓને ૯ ટકાના દરે મોંઘવારી ભથ્થું મળશે. ૪, ૫૦, ૫૦૯ પેન્શનરને પણ લાભ મળશે તથા ૯, ૬૧, ૬૩૮ વર્તમાન કર્મચારીઓને લાભ મળશે.
પહેલી જુલાઈ ૨૦૧૮થી એરિયર્સ પણ આપવામાં આવશે. સરકારના નિર્ણયનો અમલ ૧ ફેબ્રુઆરી ર૦૧૮થી લાગુ કરવામાં આવશે. એક સાથે રોકડમાં એરિયર્સ મળશે. માર્ચ મહિનાના પગારમાં એક સાથે એરિયર્સ મળશે. જેમાં રાજ્ય સરકાર પર વાર્ષિક રૂ.૭૭૧ કરોડનું ભારણ વધશે.
અલ્પેશ ઠાકોર વિશે નીતીન પટેલને પૂછતા તેમણે કહ્યું કે, અલ્પેશ કેમ મુખ્યમંત્રીને મળ્યા મને ખબર નથી. ધારાસભ્ય હોવાથી તે મુખ્યમંત્રીને મળી શકે છે. કોઈ કામ અટક્યું હોય, નવી માગણી હોય, તો તે સરકાર પાસે રજૂઆત કરી શકે છે.