વડોદરા, તા.૧પ
કોર્ટ સંકુલમાં વકીલોની બેઠક વ્યવસ્થાના અભાવના મુદ્દે સવિનય કાનૂન ભંગ કર્યા બાદ સોમવારે ગેટ નંબર : ર પાસે બાર એસો. પ્રમુખ હસમુખ ભટ્ટની આગેવાનીમાં વિરોધ વ્યક્ત કરાયો હતો. જેના પગલે દોડી આવેલી ગોત્રી પોલીસે હસમુખ ભટ્ટની ધરપકડ કરતાં વકીલ મંડળે અચોક્કસ મુદ્દતની હડતાળનું એલાન આપ્યું હોવાનું જાણવા મળે છે.
વડોદરાના નવા કોર્ટ સંકુલમાં વકીલોને બેસવા માટે ટેબલ-ખુરશીની યોગ્ય વ્યવસ્થા ના હોવાના કારણે છેલ્લા ઘણાં સમયથી વિવાદ ચાલી રહ્યો છે. તાજેતરમાં બાર. એસો.ના પ્રમુખ હસમુખ ભટ્ટે કોર્ટ સંકુલની લોબીમાં ટેબલ-ખુરશી મૂકી સવિનય કાનૂન ભંગ કર્યો હતો. જેને ભગલે ડિસ્ટ્રીક્ટ જજે નોટિસ પાઠવ્યો હતો અને પોલીસે તેઓને ત્યાંથી ખસેડ્યા હતા.
આજે વકીલોની બેઠક વ્યવસ્થાના મુદ્દે બાર. એસો. પ્રમુખ હસમુખ ભટ્ટની આગેવાનીમાં ગેટ નં. ર ખાતે દેખાવો કરવામાં આવ્યા હતા. વકીલોના વિરોધને પગલે ગોત્રી પોલીસ દોડી આવી હતી. એક તબક્કે વકીલ મંડળના પ્રમુખ અને ગોત્રી પોલીસ વચ્ચે ચકમક ઝરી હતી. એ તબક્કે પ્રમુખ જમીન પર બેસી જઈ વિરોધ વ્યક્ત કર્યો હતો. આખરે પોલીસે હસમુખ ભટ્ટની ધરપકડ કરી હતી. બીજી તરફ પ્રમુખની ગેરકાયદે ધરપકડ કરવામાં આવી હોવાના આક્ષેપ સાથે બાર. એસો.ના વકીલોએ અચોક્કસ મુદ્દતની હડતાળનું એલાના આપ્યું છે. જેમાં મોટી સંખ્યામાં વકીલો જોડાયા છે.