દાહોદ, તા.૨૭
આક્ષેપ-પ્રતિઆક્ષેપ સાથે બનેલા જિલ્લાના જેસાવાડા ખાતેના બનાવ સંબંધે પોલીસે ૨૭ જેટલા ઈસમો સહિત ૩૦૦થી ૪૦૦ના ટોળા વિરૂદ્ધ હુલ્લડનો અને આર્મએક્ટ તથા પબ્લીક પ્રોપર્ટીના નુકસાન સબબનો ગુનો નોંધી વધુ તપાસ હાથ ધરી છે. દાહોદ દોડી આવેલા આઈજી સહિતના ઉચ્ચ અધિકારીઓએ ઘટના સ્થળની મુલાકાત લઈ સમગ્ર પરિસ્થિતિનો તાગ મેળવ્યો હતો તે ઘટનામાં મોતને ભેટેલા ઈસમનું પેનલ પોસ્ટમોર્ટમ કરી તેના મૃતદેહને ભારે સમજાવટના અંતે સ્વજનોએ સ્વીકાર્યો હતો તો ગરબાડાના ધારાસભ્ય, માજી સાંસદ, ભાજપા અગ્રણી સહિતના લોકોએ પણ સિવિલ ખાતે આવી મૃતદેહને વળતર મળે અને અન્ય ઘાયલોને પણ તપાસી તેઓને પણ ન્યાય મળે તેવી રજૂઆત કરી હતી અને રાયોટીંગના બનાવની ફરિયાદની સાથે સાથે મોતને ભેટનાર ઈસમની અલાયદી ૩૦૨ મુજબની ફરિયાદ લેવાનો અને તે ફરિયાદ થાય તો જ મૃતદેહ સ્વીકારવાની પરંતુ અધિક પોલીસ અધિક્ષક તેજસ પટેલ અને એલસીબી પી.આઈ.તડવીની આગેવાનો અને મૃતદેહના સ્વજનોની સમજાવટ પછી તેના મૃતદેહને વતન જેસાવાડા ખાતે લઈ જવાયેલા રમસુભાઈ જોખનાભાઈ મોહનિયાની અંતિમવિધિ પણ શાંતિપૂર્ણ રીતે પૂર્ણ થવા પામી હતી. પોલીસના મારથી ચિલાખોટા ગામનો ઈસમ મોતને ભેટ્યો હોવાના આક્ષેપ કરનાર ચિલાકોટાના સ્વજનોની માગણી સંદર્ભે કોઈ પણ સુખદ નિકાલ આવે તે પૂર્વે જ જેસાવાડા પોલીસ મથકે થયેલી બબાલમાં સામસામે થયેલા ગોળીબાર અને પથ્થરમારામાં ઈજા પામનાર પોલીસ તથા ગ્રામજનો પૈકી રમસુભાઈનું મોત નિપજ્યું હતું જ્યારે અન્યને સારવાર માટે દાહોદના અલગ અલગ દવાખાનાઓમાં દાખલ કરવામાં આવ્યા છે. બનાવના કેન્દ્ર સ્થાને રહેલા અને જિલ્લાની પેરોલ ફ્લો સ્કવોર્ડના મારથી મરણ ગયો હોવાનું કહી તેની લાશને પોલીસ મથકમાં છોડી જનાર સ્વજનોએ તેઓની જવાબદારો સામે હત્યાનો ગુનો નોંધવાની માગણી સ્વીકારાતા તેઓએ તેના મૃતદેહને સ્વીકારી તેની પણ અંતિમવિધિ શાંતિપૂર્ણ રીતે પૂરી કરી હતી.

પોલીસે સમય સૂચકતા વાપરી હોત તો બનાવ ટાળી શકાયો હોત
જેસાવાડા ખાતે બનેલા બનાવની ગંભીરતા પારખી જો પોલીસે સમય સૂચકતા વાપરી ગઈ કાલે જ બપોરના ચિલાકોટા ગ્રામજનોની માગણી સ્વીકારી કાયદાકીય પ્રોસિજરનો આગ્રહ ન રાખતા આ બનાવ ટાળી શકાયો હોત આટલુ નુકસાન થયા પછી આખરે આજે પોલીસે મરણ જનાર કનેશની માતાની ફરિયાદને આધારે ઈપીકો કલમ ૩૦૨,૧૧૪ મુજબ ગુનો નોંધી આગળની કાર્યવાહી હાથ ધરી છે. પોલીસે લાડુલીબેન મસુલ ગમારની ફરિયાદ મુજબ તા.૨૫/૧૦/૧૭ના રોજ રાત્રીના આશરે સાડાબારના સુમારે સોમાભાઈ પોલીસવાળા તથા અન્ય ચાર પોલીસના માણસો તેઓના ઘરે જઈ ઉઠો ઉઠો તેમ કહી ઘરનો દરવાજો ખોલી અંદર ઘૂસી જઈ અંદર સૂતેલા કનેશભાઈ મસુલભાઈ ગરમા તથા તેના ભાઈ નરેશ મસુલને ઉઠાડી ઘરમાંથી બહાર લાવી આંગણામાં ઠીકા મુકી કરી ગડદાપાટુનો માર મારી ગેબી ઈજાઓ કરતા કનેશભાઈનું મોત નિપજાવ્યું હોવાની કેફિયત રજૂ કરી તેઓની સામે ગુનો નોંધાવ્યો હતો. જેસાવાડામાં અન્ય ગામના ઈસમો કેમ અને કયા સંજોગોમાં આવ્યા અને આવ્યા તો પોલીસે આ અંગે ધ્યાન કેન્દ્રીત કેમ ન કર્યું એવા અનેક સવાલો સાથે બનાવ અંગે કેટલાય ચોકાવનારા તારણો અને કારણો બહાર આવવાની શક્યતાઓ નકારી શકાતી નથી.