ન્યુઝીલેન્ડ સામેની સિરીઝની બીજી ટેસ્ટમાં જો રૂટે બેવડી સદી ફટકારી

હેમિલ્ટન,તા.૨
ન્યૂઝીલેન્ડ સામે હેમિલ્ટન ખાતે સીરિઝની બીજી ટેસ્ટમાં ઇંગ્લેન્ડના કપ્તાન જો રૂટે બેવડી સદી મારી હતી. સોમવારે મેચના ચોથા દિવસે તે ૨૨૬ રન બનાવીને આઉટ થયો હતો. તે સાથે જ રૂટ કિવિઝની ધરતી પર બેવડી સદી મારનાર પ્રથમ વિદેશ કેપ્ટન બન્યો છે. આ તેના કરિયરની ત્રીજી અને વિદેશમાં પહેલી બેવડી સદી છે. મેચના ચોથા દિવસે ઇંગ્લેન્ડ ૪૭૬ રનમાં ઓલઆઉટ થયું હતું. મહેમાન ટીમે અંતિમ ૫ વિકેટમાં ૨૦૭ રન જોડ્યા હતા. રૂટ અને ઓલી પોપે છઠ્ઠી વિકેટ માટે ૧૯૩ રનની પાર્ટનરશીપ કરી હતી. પોપ ૭૫ રને આઉટ થયો હતો. આ તેના કરિયરની પહેલી ફિફટી હતી.
પોપ અને રૂટની જોડી તૂટતાં જ ઇંગ્લેન્ડની ઇનિંગ્સ તરત સમાપ્ત થઇ ગઈ હતી. પોપ આઉટ થયો ત્યારે ઇંગ્લેન્ડનો સ્કોર ૪૫૫/૬ હતો. તે પછી છેલ્લા ચાર બેટ્‌સમેન ૨૧ રનમાં આઉટ થઇ ગયા હતા. રૂટના રૂપમાં ઇંગ્લેન્ડની સાતમી વિકેટ પડી ગઈ હતી. તેણે ૪૪૧ બોલમાં ૨૨ ચોક્કા અને ૧ છગ્ગો માર્યો હતો.કિવિઝ પ્રથમ દાવમાં ૩૭૫ રન કર્યા હતા. જવાબમાં ઇંગ્લેન્ડે ૪૭૬ રન ફટકાર્યા હતા. ચોથા દિવસના અંતે કિવિઝે ૨ વિકેટે ૯૬ રન કર્યા હતા. તે ઇંગ્લેન્ડથી ૫ રન પાછળ છે. કેન વિલિયમ્સન ૩૭ અને રોઝ ટેલર ૩૧ રને અણનમ છે. પહેલ ટેસ્ટ કિવિઝે એક ઇનિંગ્સ અને ૬૫ રને જીતી હતી.