(સંવાદદાતા દ્વારા) પાલનપુર, તા.૧૧
પાલનપુર જૂના આરટીઓ ચોકડી નજીક આવેલા શાહ આચાર્ય પેટ્રોલપંપે મંગળવારે બપોરના સુમારે નાણાં લેવા માટે આવેલી વાનના કેશિયર ઉપર હુમલો કરી રૂા.૨.૪૧ લાખની લૂંટવાનો પ્રયાસ કરાયો હતો. જો કે, બાઇક ઉપર આવેલા ત્રણ શખ્સો લૂંટની ઘટનાને અંજામ આપે તે પહેલાં વાનની સિક્યુરિટી, પેટ્રોલપંપના કર્મચારી અને બાજુમાં આવેલા ટાવરના કર્મચારીઓએ એક લૂંટારૂને ઝડપી લીધો હતો. જ્યારે બાકીના બે બાઇક ઉપર ફરાર થઇ ગયા હતા. જ્યાં થયેલી ઝપાઝપીમાં પેટ્રોલપંપના એક કર્મચારીને ઇજા થવા પામી હતી. આ અંગે પાલનપુર પશ્ચિમ પોલીસ મથકે નોંધાયેલી ફરિયાદના આધારે પોલીસે ઝડપાયેલા શખ્સની પૂછતાછ હાથ ધરી નાસી છૂટેલા લૂંટારૂઓને શોધવાના ચક્રો ગતિમાન કર્યા છે.
પ્રાપ્ત માહિતી મુજબ પાલનપુર એચ.ડી.એફ.સી. બેંકની વાન દ્વારા દરરોજ શહેરના જુદા-જુદા પેટ્રોલપંપ સહિતના સ્થળોએથી રોકડ રકમ જમા લેવામાં આવે છે. જ્યાં આ વાનના ચાલક ઇમ્તિયાજભાઇ બેલીમ, કેશિયર મહેબુબખાન કાલેટ અને ગાર્ડ કાનજીભાઇ લક્ષ્મણભાઇ એલિયા રાબેતા મુજબ મંગળવારે શહેરના પેટ્રોલપંપની કેસ એકત્ર કરી બપોરના સમયે શહેરના જૂના આરટીઓ ચોકડી નજીક આવેલા શાહ આચાર્ય પેટ્રોલપંપે રોકડ લેવા માટે આવ્યા હતા. જ્યાં કેશિયર મહેબુબખાન પેટ્રોલપંપના કર્મચારી પાસેથી રૂા.૨,૪૧,૦૭૦ એક થેલામાં મૂકી વાન તરફ આવ્યા હતા અને વાનમાં બેસવા જાય તે પહેલાં બાઇક ઉપર આવેલા બુકાનીધારી ત્રણ શખ્સો પૈકી એક જણાએ કેશિયરના હાથમાંથી નાણાં ભરેલો થેલો ઝૂંટવવાનો પ્રયાસ કર્યો હતો. જો કે, કેશિયરે બૂમાબૂમ કરતાં પેટ્રોલપંપના કર્મચારીઓ, બાજુમાં આવેલા ટાવરના કર્મચારીઓ અને વાનનો સિક્યુરિટી ગાર્ડ ત્યાં દોડી ગયા હતા. જેમણે થેલો ઝૂંટવવાનો પ્રયાસ કરી રહેલા શખ્સને પકડી લીધો હતો. જ્યારે બાકીના બે શખ્સો બાઇક લઇને ફરાર થઇ ગયા હતા. દરમિયાન ઝડપાયેલા શખ્સને પાલનપુર પશ્ચિમ પોલીસ મથકે સોંપવામાં આવ્યો હતો.