મદ્રેસાઓની વીડિયોગ્રાફી કરાવવી મોંઘી પડી, હાઈકોર્ટે યોગી સરકાર પાસે માંગ્યો જવાબ

(એજન્સી) લખનૌ, તા.પ
ઉત્તરપ્રદેશમાં સ્વતંત્ર દિવસના અવસરે યોગી સરકાર દ્વારા તમામ મદ્રેસાઓમાં પર્વની ઉજવણીની વીડિયોગ્રાફીનો આદેશ આપવામાં આવ્યો હતો. મુખ્યમંત્રી યોગી આદિત્યનાથ દ્વારા આપવામાં આવેલ આ આદેશ પર અલ્હાબાદ હાઈકોર્ટે જવાબ માંગ્યો છે. યોગી સરકારના આદેશ અંતર્ગત સ્વતંત્રતા દિવસે મદ્રેસાઓમાં રાષ્ટ્રધ્વજ ફરકાવવાનો અને રાષ્ટ્રગીત ગાવાનો તેમજ આ કાર્યક્રમની વીડિયોગ્રાફી કરવાનો આદેશ અપાયો હતો. આ આદેશ વિરૂદ્ધ અલ્હાબાદ કોર્ટમાં નવાબ મહમૂદ દ્વારા અરજી દાખલ કરવામાં આવી હતી. આ અરજી પર ચીફ જસ્ટિસ ડી.બી.ભોંસલે અને જસ્ટિસ એમ.કે.ગુપ્તાની બેંચ દ્વારા સુનાવણી કરવામાં આવી હતી અને તેમણે યોગી સરકારને જવાબ દાખલ કરવાનો આદેશ આપ્યો છે. આ મામલે આગામી સુનાવણી ૧૪મી સપ્ટેમ્બરના રોજ હાથ ધરાશે. નોંધનીય છે કે, મદ્રેસાઓમાં વીડિયોગ્રાફી કરાવવાનો મામલો પ્રથમવાર સામે આવ્યો છે. કેટલાક મદ્રેસાઓએ વીડિયોગ્રાફી કરાવવાના આ આદેશને માનવાનો સ્પષ્ટપણે ઈન્કાર કર્યો હતો.