(સંવાદદાતા દ્વારા) લુણાવાડા, તા.૧૦
વિદેશોમાં મડ ફેસ્ટીવલ ઉજવાતો હોય છે. જેમાં લોકો એકબીજાને કાદવ નાખે છે. કાદમાં આળોટે છે. પરંતુ મહીસાગર જિલ્લાના ખાનપુર તાલુકાનું બોરવાઈ કંપાના પગી ફળિયાના લોકો રોજ આ રમત તંત્રના અરોમાયા વર્તનથી પરાણે રમવા મજબૂર બન્યા છે. એમના માટે આ કાયમની સમસ્યા છે. આ ગામમાં જવા કોઈ બીજો રસ્તો જ નથી. ગામના લોકોને કાદવમાંથી જ પસાર થવું પડે છે. તંત્રના બેદરકાર વલણથી ત્રસ્ત ગ્રામજનો ઉગ્ર આંદોલનનું મૂડ બનાવી ચૂક્યા છે. બોરવાઈ કંપા ગામનું પગી ફળિયું જે પ૦ જેટલા ઘરનું ૪૦૦થી વધુનું મતદાન ધરાવતું ફળિયું છે. જે ફળિયાથી ૩ કિમી અંતરે મુખ્ય માર્ગ પાકો રસ્તો આવેલો છે. આ ફળિયાથી પ્રાથમિક શાળા સુધી જવા માટે તેમજ મુખ્ય માર્ગ સુધી પહોંચવા માટે ગ્રામજનોને એક કોતરમાં થઈને પસાર થવું પડે છે. આ કોતર ચોમાસા દરમિયાન તો છાતી બરાબર પાણીથી ભરેલું રહે છે. ત્યારબાદ જ્યારે પાણી ઉતરે છે તો પણ ગ્રામજનોના પગ ઘૂંટણ સુધી તો ડૂબે જ છે. અધૂરામાં પૂરું કાંપવાળી જગ્યા હોઈ રથી ૩ ફૂટ સુધી પગ ઉતરી જાય એટલો કાદવ રહે છે. બીજા શબ્દોમાં કહીએ તો ગ્રામજનો માટે આ એક જ રસ્તો છે અને એ પણ કાદવનો રસ્તો, સૌથી વધારે મુસીબત તો આ ગામની મહિલાઓને પડી રહી છે. કોઈ સાજું માંદું હોય કે કોઈનું મૃત્યું થયું હોય કે બાળકોને શાળાએ મોકલવાના હોય કાદવના રસ્તા પરથી પસાર થયા વગર ગ્રામજનો માટે કોઈ આરો નથી. આ રસ્તાને લઈને અનેક રજૂઆતોનું કોઈ પરિણામ ના મળતા ગામલોકોએ બાળકોને સ્કૂલમાં નહીં મોકલવા તેમજ આગામી ચૂંટણીનો બહિષ્કાર કરવાની પણ ચીમકી ઉચ્ચારી છે. હવે જોવું એ રહ્યું કે ગામ લોકોની રજૂઆત સરકાર સુધી પહોંચે કે કેમ ?
અત્રેના ગ્રામજનો ૧૯૪૭ અગાઉ જેમ જીવતા હતા તેમ ચોમાસા દરમિયાન જીવે છે. આ ગામમાં તો કોઈ વિકાસ થતો નથી.
રસ્તો નહીં તો મતદાન નહીં
કોઈ સગર્ભા સ્ત્રી હોય કે બીમાર હોય અહિંયા ૧૦૮ જેવી પ્રાથમિક સુવિધાઓમાંની એક સુવિધા પણ નથી મળી શકતી. કોઈ બીમાર હોય કોઈને ડિલિવરીવાળી તકલીફ હોય તો અમારે જોળી કરી મુખ્યમાર્ગ સુધી આવવું પડે છે. અરે! કોઈ મૃત્યુ પામે તો પણ આજ કાદવમાંથી મહામુસીબતે પસાર થવું પડે છે. આ રસ્તો નહીં બને તો કોઈ પણ ગામનું વ્યક્તિ મતદાન નહીં કરે કે બાળકોને ભણવા પણ નહીં જવા દે.
– શિલ્પાબેન પગી, સ્થાનિક મહિલા