મસ્જિદો પર હુમલા બાદ ભયભીત ન્યુઝીલેન્ડના મુસ્લિમો

(એજન્સી)
નવી દિલ્હી, તા.૧૬
ન્યુઝીલેન્ડમાં ક્રાઈસ્ટ ચર્ચ વિસ્તારમાં બે મસ્જિદોમાં થયેલ આતંકી હુમલામાં ૪૯ લોકોનાં મૃત્યુ થયા હતા જ્યારે ર૦ ઘાયલ થયા હતા. પ્રથમ હુમલો અલ-નુર મસ્જિદ અને બીજો હુમલો લિનવુડ મસ્જિદ પર થયો.
હુમલાખરોમાંનો એક ઓસ્ટ્રેલિયન નાગરિક હોવાનો અહેવાલ છે. આ હુમલાખોરોએ મસ્જિદમાં ઘૂસી ગોળીબારો કર્યા હતા. ત્રણ લોકોની આ મુદ્દે અટકાયત કરવામાં આવી છે. હુમલાખોરોની કારમાંથી વિસ્ફોટક પદાર્થો પણ જપ્ત કરવામાં આવ્યા છે.
ન્યુઝીલેન્ડના વડાપ્રધાને આ હુમલા બાદ નિવેદન આપ્યું કે આ દેશ માટે કાળો દિવસ છે. આ હુમલો સ્થાનિકોને નિશાન બનાવવા કરાયો હતો. આ લોકો ભલે ન્યુઝીલેન્ડમાં જન્મ્યા ન હોય પરંતુ તેમણે પોતાની ઈચ્છાથી ન્યુઝીલેન્ડમાં રહેવાનું પસંદ કર્યું. આ આપણા જ લોકો છે. આ હુમલાની નિંદા કરીએ છીએ. આપણે ઉગ્રવાદી વિચારધારા અને હિંસક લોકો પ્રતિ વધુ સતર્ક રહેવું પડશે.