(સંવાદદાતા દ્વારા) જામનગર, તા.૧૪
જામનગર મહાનગર પાલિકાનાં બે અધિકારીને ફરજમાં બેદરકારી દાખવવા બદલ મ્યુનિ. કમિશ્નર દ્વારા સસપેન્ડ કરવામાં આવ્યા છે. આ ઉપરાંત એક વર્ક આસીસ્ટન્ટને પણ છુટા કરવામાં આવ્યા છે. જામનગર મહાનગર પાલિકાનાં કમિશ્નર આર.બી.બારડ ગઈકાલે શહેરમાં રૃટીન રાઉન્ડ માટે નીકળ્યા હતા. તેઓ દિગ્જામ સર્કલ પાસે પહોંચ્યાં ત્યાં રોડ ઉપર ખોદકામ ચાલી રહ્યું હતું. આથી કમિશ્નર દ્વારા સ્થળ પર પોતાની ગાડી રોકાવી કામ બાબતે શ્રમીકને પૂછપરછ કરતા ત્યારે કામ બાબતે અજ્ઞાનતા દર્શાવી હતી. આથી કમિશ્નરએ તુંરત જ સમર્પણ ઈએસઆઈ માં ફરજમાં રહેલા નાયબ ઈજનેર બી.એમ.નકુમ તથા જુનિયર ઈજનેર કિશોર પીઠીયાને સ્થળ ઉપર બોલાવ્યા હતાં. અને ખોદકામ શા માટે કરવામાં આવી રહ્યું છે તે અંગે પૂછપરછ કરતા આ બંને અધિકારીઓ પણ શું કામ ચાલે છે તે જાણતા ન હતાં આથી મ્યુનિ. કમિશ્નર પણ માથું ખંજાળવા લાગ્યા હતાં. અને ગઈકાલે ભરત નકુમ અને કિશોર પીઠીયાને ફરજમાં બેદરકારી દાખવવા બદલ સસપેન્ડ કરી નાંખ્યા હતાં.
